Ричард Буанган: Монгол байгалийн гамшигт өртөмтгий орон

АНУ-ын Засгийн газраас Олон улсын хөгжлийн агентлаг (USAID)-аар дамжуулан Монголын ард иргэдийг байгалийн гамшигт бэлэн байх, үр дүнтэй хариу арга хэмжээ авахад туслах зорилго бүхий гурван жилийн хугацаанд хэрэгжүүлэх, 7.2 тэрбум төгрөг буюу  2.1 сая ам.долларын  санхүүжилттэй төсөл эхлүүлж буйгаа мэдэгдлээ.

USAID болон “Дэлхийн зөн” олон улсын байгууллага хамтран хэрэгжүүлэх “Уур амьсгалд тэсвэртэй орон нутаг” төсөл нь Монгол улсын хот, хөдөөгийн ард иргэдийг цаг агаарын эрс тэс үзэгдэл, байгалийн гамшиг, малын өвчний дэгдэлтийн үед аюулгүй байх, амьжиргааг хамгаалахад дэмжлэг үзүүлэх аж.

АНУ-аас Монгол улсад суугаа Элчин сайд Ричард Буанган нээлтийн үеэр “Монгол бол байгалийн гамшигт өртөмтгий орон бөгөөд харамсалтай нь уур амьсгалын өөрчлөлт эдгээр үзэгдлийн давтамж, ноцтой байдлыг нэмэгдүүлж байна. Энэхүү шинэ төсөл нь Монголын ард иргэдийг байгалийн гамшигт бэлэн байх, хариу арга хэмжээ авахад нь туслах зорилготой. Тус агентлагаас амжилттай хэрэгжүүлсэн өмнөх хөтөлбөрүүд дээр тулгуурласан төсөл юм” гэжээ.

АНУ-ын ОУХА нь гэр бүл, эд хөрөнгө, мал сүргийг гамшгаас хамгаалах чиглэлээр орон нутгийн удирдлага, ард иргэдтэй хамтран ажиллана. Төслийн хүрээнд газар хөдлөлт, ган, зуд, ой, хээрийн түймэр зэрэг гамшиг ослын үед ард иргэдийн бэлэн байдлын бэлтгэл, хариу арга хэмжээ авахад дэмжих зорилгоор яаралтай тусламж, анхны тусламж, гамшгийн төлөвлөлтийн талаар сургалтууд зохион байгуулна. Мөн энэ төслийн хүрээнд хээрийн мал эмнэлгийн үйлчилгээг сайжруулах, малын өвчнөөс урьдчилан сэргийлэх арга хэмжээний талаар малчидтай хамтран ажиллах юм байна.

АНУ-ын ОУХА-аас орон нутгийн удирдлагуудтай хамтран гамшгийн эрсдэлийг бууруулах хөтөлбөрүүдийг 2010 оноос хойш хэрэгжүүлж байгаа аж. Нийт 30 гаруй тэрбум төгрөг буюу ойролцоогоор 9 сая ам. Долларын  санхүүжилт олгожээ.