Дахин газар хөдөлсөн тул эрэн хайх, аврах ажиллагааг ТҮР ЗОГСООЛОО

БНТУ-д үүрэг гүйцэтгэж байгаа Монгол Улсын Аврах баг өчигдөр буюу хоёрдугаар сарын 11-нд барилгын нурангиас гурван хүний цогцсыг илрүүлэн орон нутгийн сайн дурынханд байршлыг мэдээлж, хоёр хүний (нэг нь хүүхэд) цогцсыг гаргасан байна.

Түүнчлэн хоёрдугаар сарын 12-ны өдрийн 02:39 цаг /Анкарагийн цагаар 02.11-ний өдрийн 21:39/-т хүчтэй газар хөдөлсөн тул эрэн хайх ажиллагааг түр зогсоолоо.

Аврах багийн эмнэлгийн бүлэг мөн өдөр хээрийн эмнэлэгт нийт 92 хүнд /8 нь хүүхэд/ үзлэг, оношилгоо хийж эмнэлгийн яаралтай тусламж үзүүлэв.

Эдгээрээс ясны хугаралтай 8 хүний хугарлыг засаж, боолт тавьсан бол 34 хүнд өвчин намдаах, 11 хүнд шингэн сэлбэх эмчилгээг хийжээ. Мөн 45 хоногтой 2 нярай хүүхдэд үзлэг, эмчилгээ хийж, тэжээлийн дутагдалд орсон байсан тул дараагийн шатлалын эмнэлэгт хүлээлгэн өгсөн байна гэж Онцной байдлын ерөнхий газраас мэдээллээ.