“Korea Coal” Хотгор шанагын уурхайг зарах шийдвэр гаргажээ

Увс аймгийн Бөхмөрөн суман дахь Хотгор шанагын уурхайг 2010 онд БНСУ-ын компанид дамлан зарсны ард хэн хэн хожсон бэ гэх агуулгатай мэдээллүүд өнгөрсөн жилүүдэд хэвлэлээр олонтаа гарч байсан билээ.

Тэгвэл Өмнөд Солонгосын Yonhap news агентлаг Хотгор шанагын уурхайг эзэмшигч "Korea Coal" корпораци 13 жилийн дараа Монгол дахь нүүрсний уурхайгаа зарах гэж байна гэсэн мэдээлэл нийтэлжээ.

Yonhap news  агентлагийн мэдээлснээр БНСУ-ын  нүүрсний корпораци 2010 онд худалдаж авсан Хотгор шанага нүүрсний уурхайг худалдах үйл ажиллагааг сурталчилж эхэлжээ.

Сүүлийн үед олон улсын зах зээлд нүүрс зэрэг эрчим хүчний түүхий эдийн үнэ өссөнтэй холбоотойгоор Монголын нүүрсний уурхайнуудыг цэгцлэх цаг нь болсон гэж тус корпораци үзжээ. Улмаар Хотгор шанагын уурхайг зарах тендер зарлахаар бэлтгэл  ажлаа хангаж буйгаа энэ сарын 10-ны өдөр мэдээлжээ.

Хотгор шанагын  нүүрсний уурхай нь тус корпораци байгуулагдсанаас хойш гадаадад худалдан авсан анхны нүүрсний уурхай аж.

Тус корпорацийн зүгээс "Монголд Азийн хурдны зам нээгдсэнээр авто замын дэд бүтэц сайжирч, сүүлийн үед олон улсад түүхий эдийн үнэ өссөний ачаар гадаадаас хувьцаа авах хүсэлтэй компаниуд бидэнтэй холбогдож байна" гэсэн байна.

Монголын нүүрсний уурхайнуудын борлуулалтын нийт дүн, удирдлагын эрхийн урамшууллыг оруулаад ойролцоогоор 40 тэрбум вон болно гэж тус корпораци мэдэгджээ.

Korea Coal корпораци дотоодын хувьцаа эзэмшигчидтэй зөвлөлдсөний дараа өөрийн эзэмшлийн хувьцааг худалдах тендерийн үйл ажиллагааг явуулах аж.

Тус корпораци 2010 оны арванхоёрдугаар сард Хотгор шанага нүүрсний уурхайн 51 хувийг 10 сая доллар буюу тухайн үеийн ханшаар 10.9 тэрбум воноор худалдан авах гэрээг хоёр компанитай хийж байсан гэж мэдээлэлд дурджээ.

Эх сурвалж: Yonhap news