Монгол Улс “Тогтвортой хөгжлийн зорилго”-ын хэрэгжилтээ НҮБ-д танилцууллаа

АНУ-ын Нью-Йорк хотноо Тогтвортой хөгжлийн асуудлаарх  Улс төрийн өндөр түвшний чуулга уулзалт 2023 оны долдугаар сарын 10-20-ны өдрүүдэд болж өндөрлөлөө.

Уг чуулга уулзалтын үеэр Эдийн засаг, хөгжлийн дэд сайд Г.Түвдэндорж тэргүүтэй Монгол улсын төлөөлөгчид  “Тогтвортой хөгжлийн зорилго”-ын хэрэгжилтээ тайлагнаж, хоёр дахь удаагийн Үндэсний сайн дурын илтгэлээ (ҮСДИ) танилцууллаа.

Илтгэлдээ анхны ҮСДИ-ийн дүгнэлт зөвлөмжийн хэрэгжилт хөгжлийн бодлогуудад хэрхэн туссан тухай болон тогтвортой хөгжлийн нэгдмэл, цогц, оновчтой систем бий болгохын тулд  нийгмийн бүхий л талын оролцоог хангах механизм нэн чухал болохыг онцолжээ.

 Манай илтгэлтэй холбогдуулан Румын, Узбекистан, Тажикстан улс болон иргэний нийгмийн төлөөлөгчид  үг хэлж, асуулт асууж, хариулт авчээ.

Энэ удаагийн чуулга уулзалтаар нийт 39 улс болон Европын холбоо “Тогтвортой хөгжлийн зорилго”-ын хэрэгжилтээ дүгнэн тайлагнаж, цаашид авч хэрэгжүүлэх арга хэмжээ, хамтын ажиллагааны талаар хэлэлцсэн байна.