Нэмэлт санхүүжилт шаардагдах 4 дүгээр багцын ажлыг эхлүүлэх ШИЙДВЭР гаргана

Өнөөдөр /2023.09.08/ Ерөнхий сайд Л.Оюун-Эрдэнэ Дорноговь аймагт ажиллахдаа, Газрын тос боловсруулах үйлдвэрийн бүтээн байгуулалтын  ажлын явцтай танилцах үеэрээ Засгийн газар бүтээн байгуулалтыг бүхий л талаар дэмжихээ илэрхийлээд Засгийн газрын хуралдаанаар үйлдвэрийн ЕРС-04 багцын ажлыг эхлүүлэх шийдвэр гаргана гэдгийг хэллээ.

Сануулахад, Газрын тос боловсруулах үйлдвэр байгуулах төслийн менежментийн зөвлөх “Инженерс индиа лимитэд” компанийн ерөнхий захирал Вартика Шукла  өнгөрсөн сарын 17-нд Улсын Их Хурлын дэд дарга Л.Мөнхбаатартай уулзалт хийх үедээ,    үйлдвэрийг бүрэн ашиглалтад оруулах ЕРС-04 багц ажлыг хэрэгжүүлэхэд нэмэлт санхүүжилтийн асуудлыг шийдвэрлэх шаардлагатай байгаа тул парламентын зүгээс дэмжлэг хүсэж буйгаа илэрхийлж байсан. 

Төслийн зардлын хэмжээ 2018 оны ТЭЗҮ-ээр тооцоолсон дүнгээс 30 хувиар буюу 457 сая ам.доллароор нэмэгдсэн. Энэтхэгийн Засгийн газар энэ санхүүжилтийг олгох боломжтой гэсэн байр суурийг илэрхийлсэн байгаа юм. 

Тэгэхээр Засгийн газрын хуралдаанаар үйлдвэрийн ЕРС-04 багцын ажлыг эхлүүлэх шийдвэр гаргаснаар санхүүжилтийг зээлээр шийдвэрлэх алхмууд хийгдэх биз ээ.