ADB: Монгол Улсын эдийн засгийн сэргэлт энэ онд үргэлжилнэ

Азийн Хөгжлийн Банкнаас "Азийн хөгжлийн төлөв" эдийн засгийн шинэ  тайлангаа өнөөдөр /2023.09.20/  танилцуулж байна.  

Монгол Улсын эдийн засгийн сэргэлт энэ онд үргэлжилж, дотоодын нийт бүтээгдэхүүний /ДНБ/өсөлт ойрын хугацаанд хадгалагдахаар байгааг  шинэ тайланд онцолжээ. 

Эдийн засгийн өсөлтийг гадаад эрэлт, экспортын сэргэлт, дотоод эрэлт дэмжихээр байгаа хэдий ч, өндөр инфляц, түүний эсрэг мөнгөний хатуу бодлого, дотоод санхүүжилтийн нөхцөл чангарсан зэрэг нь хязгаарлаж байна. 

Азийн Хөгжлийн Төлөв тайлангийн энэ оны дөрөвдүгээр сарын дугаарт Монгол Улсын эдийн засгийн өсөлтийг энэ онд  5.4% байна гэж тусгасан бол  шинэчилсэн тайланд 5.7% гэж бага зэрэг өсгөж төсөөлжээ. 

Харин 2024 оны эдийн засгийн өсөлтийн төсөөлөл  өмнөх 6.1%-иас  ялимгүй буурч 5.9% байхаар байна.

Ирэх онд ДНБ-ий өсөлтийг уул уурхайн салбарын өсөлт, түүний тээвэр агуулах, үйлчилгээний бусад үйл ажиллагаанд үзүүлэх эерэг нөлөөлөл болон хувийн хэвшлийн зээл дэмжихээр байна. 

АХБ-ны Монгол Улс дахь суурин төлөөлөгчийн газрын ахлах эдийн засагч Эдуард Фэйбер “Эдийн засгийн сэргэлт тэнцвэргүй, салбаруудын үзүүлж буй хувь нэмэр харилцан адилгүй байгаа хэдий ч, эдийн засгийн ойрын хугацааны төлөв тогтвортой бөгөөд эерэг байна.  Үнийн тогтвортой байдлыг хангах, ажил эрхлэлтийг сайжруулах, бүтцийн шинэчлэл хийх замаар эдийн засгийн дархлааг дэмжих нь ДНБ-ий өсөлтийг тогтвортой бөгөөд хүртээмжтэй болгоход эергээр нөлөөлнө” хэмээн онцлов.

Бүгд Найрамдах Хятад Ард Улсын (БНХАУ)-ын эдийн засаг дахин нээгдэж, түүний нөлөөгөөр экспорт сэргэсэн, төлбөрийн урсгал дансны тэнцэл мэдэгдэхүйц сайжирсан, гадаад валютын улсын нөөц тогтворжиж улмаар нэмэгдсэн, гадаад өрийн эргэн төлөлтийн эрсдэл буурсан зэргээс шалтгаалж Монгол Улсын эдийн засгийн нөхцөл байдал, хүлээлт энэ оны эхнээс сайжирсан. 

Гэвч, инфляц өндөр хэвээр бөгөөд сүүлийн 27 сарын турш төв банкны зорилтот түвшнээс хэтрээд байна.

Энэ оны хоёрдугаар хагаст инфляц буурах хандлагатай хэдий ч, сүүлийн 12 сарын дундаж инфляц 2023 онд өндөр буюу 10.5%, 2024 онд 8.6% байх төсөөлөлтэй байгаа нь энэ оны дөрөвдүгээр сарын төсөөллөөс ялимгүй бага байна.  

Төсөөллийг бууруулж болзошгүй эрсдэлүүд нь БНХАУ-ын түүхий эдийн эрэлт буурах, нүүрс, металлын үнэ унах, худалдааны шинэ хязгаарлалт, геополитикийн хурцадмал байдлаас шалтгаалсан гадаад худалдааны тасалдал, санхүүжилтийн нөхцөл чангарснаас үүсэх эдийн засгийн сөрөг үр дагаврууд, дэлхийн эдийн засгийн тодорхой бус байдал ба удаашрал, хөрөнгийн урсгал хөгжиж буй орнуудаас гадагшлах зэрэг асуудлууд болохыг онцолжээ.