Асгатын мөнгөний ордыг судалсан тайланг хүлээлгэн өгчээ

2019 оны нэгдүгээр сарын 7-нд Засгийн газрын шийдвэрээр Асгатын мөнгөний орд “Эрдэнэс Монгол”-д шилжиж, тухайн жилийн цагаан сараас өмнө эдийн засгийн эргэлтэд оруулах ажлыг эхлүүлэх үүргийг өгч байсан билээ.

Гэсэн ч өнгөрсөн жилүүдэд Асгатын мөнгийг ачих галт тэрэг хөдлөөгүй өнөөдрийг хүрсэн.

Засгийн газар өнгөрсөн 2023 оны гуравдугаар сард “Эрдэнэс Монгол” ХХК-ийн дүрмийг шинэчлэн баталсан. ЗГХЭГ-ын дарга Д.Амарбаясгалангийн хэлснээр дүрэм шинэчлэгдсэнээр “Эрдэнэс Монгол” ХХК стратегийн ач холбогдолтой төсөл хөтөлбөрүүдийг дангаараа хэрэгжүүлэх боломж нээгдсэн. 

Тухайлбал, "Эрдэнэс Монгол" ХХК Асгатын мөнгөний ордыг эдийн засгийн эргэлтэд оруулах ажлыг дангаараа эхлүүлэх боломжтой боллоо гэсэн мэдээллийг өгч байв.

Тэгвэл жилийн дараа буюу энэ сарын эхээр зохион байгуулагдсан Олон улсын ашигт малтмалын хайгуул, олборлолтын чуулганы үеэр, "Эрдэнэс Монгол” нэгдэл Асгатын мөнгөний ордын судалгааны тайланг хүлээн авчээ.

Тодотгоход, "Эрдэнэс Монгол” нэгдэл АНУ-ын Делойтт компанитай хамтран 2023 онд Асгатын мөнгөний ордын 10 мянган га талбайд Агаарын геофизикийн судалгааны ажлыг хийж гүйцэтгэсэн бөгөөд уг судалгааны ажлын үр дүнгийн тайланг ийнхүү хүлээлгэн өгсөн байна.

Монгол Улсын УУХҮЯ-ны дэмжлэгтэй, АНУ-ын Төрийн департментын санхүүжилтээр “Эрчим хүч, эрдсийн засаглал” хөтөлбөрийн хүрээнд хийгдсэн уг ажил нь Асгатын мөнгөний ордыг иж бүрэн судлах, шинэ хүдрийн биетийг нээн илрүүлэхэд чиглэсэн бөгөөд цаашид геологи, хайгуулын ажлын нарийвчилсан төлөвлөгөө боловсруулахад дэмжлэг болно гэсэн мэдээллийг албаныхан өгч байна.