“Эрдэнэс Монгол” нэгдэл энэ онд ₮960 тэрбумын өр барагдуулна

Энэ оны эхний хагас жилийн байдлаар “Эрдэнэс Монгол” нэгдэл 8.9 их наяд төгрөгийн борлуулалтын орлоготой,  3.8 их наяд төгрөгийн цэвэр ашигтай ажиллаж, улс орон нутгийн төсөвт 2.5 их наяд төгрөгийн татвар, хураамжийг төвлөрүүлжээ.

Нэгдлийн 2024 оны эхний хагас жилийн эдийн засаг, санхүүгийн үндсэн үзүүлэлтийг 2023 оны мөн үетэй харьцуулахад 1.3-1.5 дахин өссөн дүнтэй байна.

Мөн 2023 онд санхүүгийн удирдлагыг оновчтой зохион байгуулж, нэгдлийн хэмжээнд хуримтлагдсан 394 тэрбум төгрөгийн өр төлбөрийг барагдуулсан бол 2024 онд Азийн хөгжлийн банкны 30 тэрбум төгрөг, “Эрдэнэс бонд”-ын 930 тэрбум төгрөгийн өр төлбөрийг барагдуулахаар ажиллаж буй аж.

Оны эхний хагас жилийн байдлаар "Эрдэнэс Монгол" нэгдэл 17.1 сая тонн чулуун нүүрс, 3.8 сая тонн эрчим хүчний хүрэн нүүрс, 7.2 мянган тонн мөнгөний баяжмал, 19.8 мянган тонн ган бүтээгдэхүүн, 1.5 мянган тонн төмрийн баяжмал, 280 мянган тонн зэсийн баяжмал үйлдвэрлэн борлуулжээ. Нэгдлийн 2024 оны эхний хагас жилийн үйлдвэрлэлийн үзүүлэлтийг 2023 оны мөн үетэй харьцуулахад 1.1-1.4 дахин өссөн байна.