Олон улсын худалдаанд ам.долларыг ашиглахаас татгалзах хандлага нэмэгдэж болзошгүй

АНУ-ын ерөнхийлөгч Доналд Трампын зарласан худалдааны түншүүддээ хатуу шахалт үзүүлэх бодлого нь олон улсын худалдаанд ам.долларыг ашиглахаас татгалзах хандлагыг дэвэргэж болзошгүй гэсэн санааг Японы эдийн засгийн Nikkei Asia сонин илэрхийлсэн байна.

Тус сонинд тэмдэглэснээр, олон улсын төлбөр тооцоонд хятадын юанийн гүйцэтгэх үүрэг нэмэгдэж байгаагийн зэрэгцээ улс орнуудын санхүүгийн нөөцөд алтны эзлэх хувь хэмжээ өсөж байгаа ажээ. АНУ-ын шинэ засаг захиргаа “Эн тэргүүнд АНУ байна” гэх маягийн эдийн засгийн бодлогыг амьдрал дээр явуулж эхэлбэл доллароос аажмаар татгалзах хандлага эрчимжинэ тус сонин үзэж байна.

Банк хоорондын төлбөр тооцооны олон улсын SWIFT системийн мэдээ баримтаас үзвэл, 2024 онд гадаад худалдааны төлбөр тооцооны 49% нь ам.доллароор хийгдэж байсан боловч 2024 оны арваннэгдүгээр сарын байдлаар юанийн эзлэх хувь 6,4% болж өссөн бөгөөд энэ үзүүлэлтээр юань дэлхийд хоёрдугаар байрт орж, евро-г /6,3%/ гуравдугаар байр руу шахсан байна.

Олон улсын валютын сангаас мэдээлж байснаар, 2024 оны есдүгээр сарын байдлаар дэлхийн алт валютын нөөцөд ам.доллар 57,4%-ийг эзэлж байжээ. Энэ хугацаанд дэлхийн нөөцөд австрали доллар, хятад юань, солонгос воны эзлэх хувийн жин мэдэгдэхүйц өссөн байна. Улс орнуудын үндэсний нөөцөд алтны эзлэх хувь нэмэгдэж байгаа бөгөөд 2018-аас 2024 онд алтны нөөцөө Бразил улс 3,2 дахин, Энэтхэг 2,5 дахин, Хятад 2 дахин нэмэгдүүлсэн аж. Дэлхийн нөөцөд алтны эзлэх хувь 1,6 дахин нэмэгдэж, ам.долларын хувийн жинг бууруулсан байна.