МАН-ын шинэ үеийн "шимэгч" Б.ЧАГНААДОРЖ

МАН-д үеийн үед аль хөрөнгө мөнгөтэй газар хаана байна, тэнд чимээгүйхэн очоод хувиа борлуулж, довоо шарлуулчихдаг ах нар цөөнгүй байсан. Үүнийг эртнээсээ “шимэгч”, “шимэгчид” хэмээн нэрлэж ирсэн билээ. Тэгвэл тэдний залгамж халаа болсон Б.Чагнаадорж гэх нөхөр Дарханы төмөрлөгийн үйлдвэр хэмээх алдагдалтай ажилладаг ч хөрөнгөлөг газарт Гүйцэтгэх захирлын үүргийг түр орлон гүйцэтгэгчээр томилогдон очжээ.

Тэрбээр урьд өмнө “Монголын цахилгаан холбоо” компанийн дэд дарга, "Эрдэнэс Монгол" компанийн Санхүүгийн хэлтэс, "Монголросцветмет" Төрийн өмчит үйлдвэрийн газар гэх мэт нэлээд шим шүүс сайтай газруудад хурган даргын алба хашсан гэхээр яах аргагүй ах нарынхаа араас явж байгаа нэгэн шинэ дүр. "Монголын цахилгаан холбоо" олон тэрбум төгрөгийн алдагдалтай ажиллах болсонд түүний оролцоо ч бий байх.

Тэрбээр ийнхүү шим шүүстэй газруудыг “шимэгч”-лэхийн тулд УИХ-ын дарга асан Г.Занданшатарт мөргөх шахам гүйж, түүний багийн залуусын өлмийг долоож байж энд хүрсэн. Харин одоо Г.Занданшатарыг УИХ-ын даргаас буусан цагаас хойш Засгийн газрын хэрэг эрхлэх газрын даргатай сүжрэх болсны шалтгаан юу вэ. Н.Учрал Төрийн өмчит компаниудын захирлыг томилдог учраас Б.Чагнаадорж түүний үүдийг сахиж, өөрийгөө үүрэг гүйцэтгэгчээс жинхэнэ захирал болгохоор зүтгэж эхэлжээ. 

Тэр бол хаана хэн эрх мэдэлтэй байна, тэдний үүдийг сахиж, өлмийг нь "үнсэж" байдаг нөхөр бололтой. МАН дотор аль шим шүүстэй, хөрөнгө мөнгөтэй газарт чимээгүйхэн албанд томилогдож байсан ах нар очсон газрынхаа шим шүүсийг хэтэрхий их сорсон учраас зохих хэмжээний ял шийтгэлээ хүлээсэн нь ч бий. Эртнээсээ Дарханы төмөрлөгийн үйлдвэрт захирлаар очсон нөхөд өөдөлдөггүй түүхтэй. Хамгийн сүүлд захирал асан Г.Дугаржав баривчлан шалгагдаж байгаа.

Тэгэхээр МАН дотор “шимэгч”-ээр тодроод байгаа Б.Чагнаадорж гэх нөхрийн тухай эргэн мэдээлэх болно.

Эх сурвалж: ӨГЛӨӨНИЙ СОНИН