“Очирдагинас” ХХК Мазаалайн хамгаалалд хувь нэмрээ оруулж эхэллээ

“Очирдагинас” ХХК нь “Байгаль, зэрлэг амьтан хамгаалах үндэсний нийгэмлэг” ТББ, “Говийн Их дархан цаазат газрын А хэсгийн хамгаалалтын захиргаа”-тай хамтран Монгол орны нэн ховор амьтан болох Мазаалай баавгайг хамгаалах зорилгоор хамтран ажиллах санамж бичиг байгууллаа.

 Мазаалай гэж хэн бэ?

Мазаалай нь зөвхөн Монголын говьд амьдардаг, дэлхий дээр үлдсэн цөөн хэдэн цөлд оршин тогтнодог цорын ганц цөлийн баавгай юм.

•  Шинжлэх ухааны нэр: Ursus arctos gobiensis
•  Тархалт: Зөвхөн Монголын говийн баруун өмнөд хэсэгт (Говийн их дархан цаазат газрын А хэсэг)
•  Ойролцоогоор үлдсэн тоо толгой: 2016 оны тооллогоор улсын хэмжээнд 22 мазаалай байсан бол 2018 онд 36 болж харин 2024 оны байдлаар мазаалайн тоо толгой 51-д хүрсэн байна.
•  Хамгийн өндөр эрсдэлтэй амьтны ангилалд ордог бөгөөд олон улсын IUCN-ийн Улаан данс болон Монголын Улаан номд бүртгэгдсэн.

Мазаалай нь говийн ширүүн уур амьсгалтай орчинд маш хүнд нөхцөлд дасан зохицож амьдардаг ч идэш тэжээл хомс, ундны усны хүрэлцээ муу, амьдрах орчинд хүний оролцоо нэмэгдэх зэрэг шалтгаанаар устах аюултай нүүр тулж байна.

 Хамтын ажиллагааны ач холбогдол

“Очирдагинас” ХХК нь шинээр худалдаанд гаргасан “Bio” брэндийн Мазаалай элэгний нухаш бүтээгдэхүүний борлуулалт бүрээс 100 төгрөгийг Мазаалайг хамгаалах ажилд зориулах бөгөөд энэхүү хөрөнгөөр:

• Мазаалайд зориулсан стандарт тэжээлүүдийг эрдэмтдийн жороор үйлдвэрлэнэ
• Тэжээлүүдийг Говийн их дархан цаазат газрын тодорхой бүсүүдэд хүргэх ажлыг зохион байгуулна
• Мазаалайн талаарх олон нийтийн ойлголтыг нэмэгдүүлэх сурталчилгааны ажлуудыг хэрэгжүүлнэ

Энэхүү санаачилга нь зөвхөн бүтээгдэхүүн сурталчилгаа бус, үндэсний бахархалт амьтнаа аврахад чиглэсэн урт хугацааны бодит дэмжлэг болж байгааг хамтран ажиллагч байгууллагууд онцолж байна.

Ишлэл:

“Мазаалай баавгай бол Монголчуудын бахархал болсон, дэлхийд цөөхөн үлдсэн онцгой амьтан. Түүнийг хамгаалах амьдрах орчныг сайжруулахад хүн бүрийн оролцоо чухал.”