Ажилгүйдлийн тэтгэмжид 89.7 тэрбум төгрөг олгожээ

Энэ оны эхний улирлын байдлаар ажилгүйдлийн даатгалын сангаас 16 мянга гаруй иргэнд 89.7 тэрбум төгрөг олгожээ. Зүйрлэвэл 2022 онд ийм хэмжээний мөнгийг бүтэн жилд олгодог байсан юм. Ийнхүү өссөн нь 2025 оны X-XII сард олгох байсан 14 мянга гаруй иргэний тэтгэмжийг 2026 онд нөхөн олгосонтой холбоотой байж магадгүй байна.

Сүүлийн жилүүдэд ажилгүйдлийн даатгалын сангийн зарлага мэдэгдэхүйц тэлж байна. Зарлага нь орлогоосоо хэтэрснээр тус сангийн алдагдал 47.5 тэрбум төгрөгт хүрээд байна. Энэ оны улсын төсөвт тусгаснаар ажилгүйдлийн тэтгэмжид 190 орчим тэрбум төгрөг төсөвлөсөн. Гэвч эхний улирлын дүнгээр 50 орчим хувийг нь олгоод байна. Үүнээс харвал он дуусахтай зэрэгцээнд ажилгүйдлийн тэтгэмж тасалдах нөхцөл үүсэж болзошгүй юм. Өнгөрсөн жил яг ийм нөхцөл үүсэж, энэ оны эхний улиралд нөхөн олгосон билээ.