БОУАӨ-ийн сайд Ц.Сандаг-Очир COP17 хурлын бүтээн байгуулалтын талбайн оройн ээлжийн ажлыг шалгалаа

Улаанбаатар хотноо 2026 оны наймдугаар сарын 17–28-ны өдрүүдэд зохион байгуулагдах НҮБ-ын Цөлжилттэй тэмцэх тухай конвенцын Талуудын XVII бага хурал буюу COP17 эхлэхэд 41 хоног үлдээд байна.

Төлөвлөгөөт ажлын хэрэгжилт, бүтээн байгуулалтын явцтай танилцаж, оройн ээлжийн ажлын зохион байгуулалтад хяналт тавин, холбогдох үүрэг, чиглэл өгөхөөр Байгаль орчин, уур амьсгалын сайд Ц.Сандаг-Очир, Дэд сайд Б.Мөнхтамир нар COP17 хурлын бүтээн байгуулалтын талбайд ажиллалаа.

Өнөөдрийн байдлаар гадна тохижилтын ажил 90 гаруй хувийн гүйцэтгэлтэй, дотор заслын ажил төлөвлөгөөний дагуу үргэлжилж байна. Хурлын хүрээнд баригдаж буй 12 түр байгууламжийг тохижилтын хамт наймдугаар сарын 6-ны дотор бүрэн дуусгаж, хүлээлгэн өгөхөөр төлөвлөжээ.

Мөн бүтээн байгуулалтын хүрээнд нийт 12 га талбайг зүлэгжүүлж, 4,800 гаруй бут сөөг тарин, гадна орчны тохижилтын ажлыг үндсэндээ бүрэн гүйцэтгээд байна.

Ажлын явцтай танилцсан Байгаль орчин, уур амьсгалын сайд Ц.Сандаг-Очир бүтээн байгуулалтын ажлыг батлагдсан хуваарийн дагуу чанар, аюулгүй ажиллагааг бүрэн ханган, хугацаанд нь дуусгаж хүлээлгэн өгөхийг холбогдох байгууллагуудад үүрэг болголоо.