Ц.Баатархүү: НИТХ-ыг тасралтгүй удирдлагаар хангах хүнийг дэмжинэ

НИТХ-ын өнөөдрийн /2019.02.28/ ээлжит хуралдаанаар Хотын даргаар сонгогдсон С.Амарсайханыг НИТХ-ын даргын үүрэгт ажлаас нь чөлөөлж, оронд нь НИТХ дахь МАН-ын бүлгийн дарга Р.Дагвыг томилох эсэх асуудлыг хэлэлцэхээр төлөвлөсөн. Хуралдааныг өнөөдөр /2019.02.28/ 09.00 цагт товлосон ч НИТХ дахь МАН-ын бүлгийн зүгээс хуралдааныг 15.00 цаг хүртэл хойшлуулах шийдвэр гаргалаа.

Тэгвэл эл асуудалд НИТХ дахь АН-ын бүлгийн дарга Ц.Баатархүүгээс байр суурийг нь сонирхлоо.  Тэрбээр "Өнөөдрийн хуралдаанаар НИТХ-ын удирдлага, зохион байгуулалтын асуудлыг хэлэлцэх ёстой байсан. Хуралдаан зарласан цагтаа эхлээгүй. Байнга болохгүй, бүтэхгүй юм ярьж байгаадаа нийслэлчүүдээсээ хүлцэл өчиж байна. НИТХ дахь АН-ын бүлгийн 11 гишүүн, хэвлэл мэдээллийнхэн ирчихээд байна. Харамсалтай нь, эрх баригч намынхан хоорондоо учраа олоогүй бололтой. Ажил явахгүй байдалтай л байна" гэв. 

Түүнчлэн "МАН-ын Удирдах зөвлөлөөс Р.Дагвыг НИТХ-ын даргад нэр дэвшүүлсэн юм билээ. Бүлгийнх нь хурал болохгүй, бүлэг дээрээ асуудлаа шийдэж чадахгүй, бүлэг нь хуралдахгүй байна. Тэд хоёр өрөөнд орчихоод НИТХ-ын ээлжит хуралдаандаа орж ирэхгүй байна л даа.  хэн, хэн нэр дэвшиж байгааг харна. НИТХ-ыг хуулийн дагуу, дэгийн дагуу цагт нь эхлүүлэх байдлаар тасралтгүй удирдлагаар хангах хүнийг л дэмжинэ" хэмээн ярилаа.