Сурагчаа зодсон багшийг АЖЛААС НЬ ХАЛНА

Хэнтий аймгийн Бор-Өндөр  цогцолбор сургуулийн 11-р ангийн сурагч Б элэг бяцарсан гэх оноштойгоор Гэмтэл согог судлалын үндэсний төвд өнгөрсөн даваа гарагт буюу энэ сарын 4-ний өдөр хэвтжээ. Түүний энэхүү гэмтэл нь багшдаа зодуулсны улмаас үүссэн гэх ба хүүгийн элэг бяцарч, хоёр газар буглаа үүссэн учраас яаралтай хагалгаанд оруулжээ.

Одоогоор хүүгийн биеийн байдал хүндэвтэр байгаа ба эмч нарын зүгээс “Чадах бүх арга хэмжээг авсан. Цаашид эмчилгээгээ хийлгээд, өдөр бүр алхвал хурдан эдгэнэ” хэмээжээ.

Харин болсон хэрэг явдлын талаар хүүгийн ар гэрийнхэн “Багш нь хичээлээсээ хоцорсон гэх шалтгаанаар хүүгийн толгой руу цохиж, гарыг нь өргүүлж байгаад элэг рүү нь хүчтэй цохисон гэж хүүхдүүд ярьсан. Хэд хоногийн дараагаас хүүгийн бие гэнэт муудаж, амьсгал нь тасалдаж эхэлсэн. Эхлээд олгой байна гэж бодсон ч дараа нь элгэнд асуудал үүссэн гэдгийг мэдсэн. Одоогоор хагалгаа амжилттай болсон ч биеийн байдал нь сайнгүй байна. Мэдээж хүүгийн буруу байсан л байх. Гэхдээ бид багшийг буруутгахгүй. Хүүг л эрүүл эсэн мэнд байлгахыг хүсч байна” гэлээ.

Хэргийн талаар БСШУС-ын сайд Ё.Баатарбилэгээс тодруулахад “Хэргийн тухай мэдээллийг өчигдөр /2019.03.15/ авсан. Өнөөдөр сургуулийн захирал, анги даасан багш нар Улаанбаатар хотод ирж байгаа. Цагдаагийн байгууллага хэргийг шалгаж байна. Багш сурагчаа зодож болохгүй. Зодож хүмүүжүүлдэг сургалтын арга барил өөрчлөгдөөд, хуульчлагдаад олон жил болж байгаа. Тийм болохоор энэ хүмүүстэй хариуцлага тооцож, ажлын байртай нь ярина” гэлээ. 

Хүүгийн гэмтлийг шүүхийн шинжээч эмч гадны нөлөөтэй үүссэн гэдгийг тогтоосон бөгөөд хэргийг цагдаагийн байгууллагаас үргэлжлүүлэн шалгаж байна.