Г.Ундармаа: Өдөрт 1800 тонн шахмал түлш үйлдвэрлэж байна

2019 оны 10 сарын 22

Нийслэлийн Засаг дарга бөгөөд Улаанбаатар хотын Захирагч С.Амарсайхан өнөөдөр /2019.10.22/ “Таван толгой түлш” ХХК-ийн үйлдвэрлэлийн явц, борлуулалт, түгээлт, нөөцлөлт ямар шатанд хийгдэж байгаатай газар дээр нь очиж танилцан ажиллалаа.

“Таван толгой түлш” ХХК-ийн борлуулалт хариуцсан захирал Г.Ундармаа “Сайжруулсан шахмал түлшний борлуулалт 359 цэгээр тогтмол хийгдэж байна. Долоо хоногт айл өрхүүдэд зургаан шуудай түлш картаар өгч байгаа. Картаа аваагүй иргэд хорооны Засаг даргаас авна. Иргэдэд картны хэрэглээг хэвшүүлэхийн тулд хичээлийн бус цагаар ажиллах хүсэлтэй оюутан, залуусыг цагийн ажилтнаар авч борлуулалтын цэгүүдэд картны хэрэглээг зааж, зөвлүүлж ажиллуулж эхэлсэн. Түлшний үйлдвэрлэлийн үйл явц одоо 7 шугамаар 24 цагийн турш явагдаж байна. Нийслэлийн Мэргэжлийн хяналтын газраас тогтмол хяналт тавьж ажиллаж байгаа. Өдөрт 1800 тонн шахмал түлш үйлдвэрлэж байна” хэмээв.

Хотын Захирагчийн зүгээс тулгамдсан ямар асуудал байгааг асууж тодруулан, цаашид хийж хэрэгжүүлэх ажлын талаар “Таван толгой түлш” ХХК-ийн ажилчидтай санал солилцов. “Шахмал түлшний түгээлт, борлуулалтын цэгүүдийн уялдаа холбоо муу, хангалтгүй байна. Орц найрлагын тогтсон горимд Мэргэжлийн хяналтын байгууллагын 24 цагийн хяналт дор түлшийг үйлдвэрлэж байгаа нь сайн байна. “Таван толгой түлш” ХХК үйлдвэрлэлийн хэвийн үйл ажиллагаагаа алдагдуулахгүй ажиллах нь чухал” гэдгийг Хотын Захирагч С.Амарсайхан хэллээ. Мөн тэрбээр дутуу шугамыг яаралтай ашиглалтад оруулах шаардлагатай гэдгийг “Таван толгой түлш” ХХК-ийн холбогдох албаны хүмүүст үүрэг болгосон юм.

Эх сурвалж: Нийслэлийн ЗДТГ-ын Хэвлэл мэдээлэлтэй харилцах хэлтэс

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
zochin(66.181.186.203) 2019 оны 10 сарын 22

UTAAGUY SAYKHAN BAYNA < ZASGIIN GAZAR , KHOTYN ZAKHIRGAA MASH ZUW ZUYL KHIIJEE , ZA TER UGAAR ENE TER BOL KHUWI KHUMUUSIIN KHARYUTSLAGA , KHUUCHIN NUURSNII CHENJUUDIIN KHIIJ BUY ASUUDAL DAA

0  |  0
Top