Нийслэлийн хэмжээнд гэмт хэрэг 20 орчим хувиар буурчээ
Д.Үржинбадам
| Zindaa.mn
2019 оны 12 сарын 23
Нийслэлийн цагдаагийн удирдах ажилтнуудын 2019 оны үйл ажиллагааны тайлангийн хурал өнөөдөр /2019.12.23/ боллоо. Энэ онд нийслэлийн хэмжээнд гэмт хэргийн гаралт 20 орчим хувиар буурчээ. Тодруулбал, өмнөх оны мөн үетэй харьцуулахад энэ онд бүртгэгдсэн гэмт хэргийн тоо 4633 хэрэг буюу 19.4 хувиар буурчээ. Мөн гэмт хэрэг илрүүлэлт 10.4 хувиар өссөн үзүүлэлттэй гарсан байна. Энэ нь 2019 онд гэмт хэргээс урьдчилан сэргийлэх, гэмт хэрэг зөрчлийг цаг алдалгүй илрүүлж, таслан зогсоох ажлыг сайжруулахын тулд авч хэрэгжүүлсэн олон ажлуудын үр дүн гэдгийг Нийслэлийн цагдаагийн удирдах газар, нийслэлийн удирдлагууд онцоллоо.
Тухайлбал, Нийслэлийн гэмт хэргээс урьдчилан сэргийлэх зөвлөлийн дарга, нийслэлийн ИТХ-ын дарга Р.Дагва хурлын үеэр “Нийслэлийн хэмжээнд гэмт хэргийн гаралт буурсан энэ амжилтаа ирэх жил улам бататган, гэмт хэргийг бууруулах, илрүүлэлтийг сайжруулахын төлөө ажиллах ёстой. Өнөөдрийн бидний тайлангийн хурал ч ирэх жилд амжилттай ажиллахын эхлэл гэж ойлгож байна. Нийслэлийн иргэдийн Төлөөлөгчдийн хурлаас энэ оны эхэнд цагдаагийн байгууллагын үйл ажиллагааг дэмжих чиглэлээр Олон нийтийн цагдаа, урамшилт эргүүл, оюутан цагдаа ажиллуулах санхүүжилтийг шийдвэрлэсэн нь тодорхой үр дүнгээ өгсөн ажил болсон. Гэмт хэрэг, зөрчлөөс урьдчилан сэргийлэх зорилгоор хоёр тэрбум найман зуун далан есөн сая гаруй төгрөгийн төсөв батлагдсан нь өмнөх оны төсвөөс 24 буюу 575.2 сая төгрөгөөр нэмэгдүүлж чадсан нь мөн үр дүнгээ өгсөн” гэлээ
Мөн өнөөдрийн тайлангийн хурлын үеэр гэмт хэргээс урьдчилан сэргийлэхэд зориулж Нийслэлийн гэмт хэргээс урьдчилан сэргийлэх зөвлөлөөс нийслэлийн цагдаагийн албанд “Нева” маркийн 20 ширхэг автомашиныг хүлээлгэн өглөө. Эдгээр автомашинуудыг дүүрэг дэх цагдаагийн хэлтсүүдэд хуваарилснаар иргэдээс ирүүлсэн дуудлага, мэдээлэлд богино хугацаанд очих боломж бүрдэх юм.
Эх сурвалж: Нийслэлийн ИТХ-ын ХМОНХТ
Холбоотой мэдээ
Copyright © 2010 - 2024 Zindaa.mn Developed by mCast LLC
Сэтгэгдэл ( 0 )