Монголоос ирсэн жуулчин 29 мянган евро дотуур өмдөндөө нуугаад баригджээ

Монголоос эх орондоо харьж явсан орос жуулчин маш их мөнгө хил давуулах гээд баригджээ.

Улаанбаатар - Москвагийн галт тэрэг хилийн Наушки боомтод дөхөж ирэхэд орос эр сандарч эхэллээ. Гаалийн шалгалт болно. Монголын талын шалгалтыг тэр эр яаж давсан нь тодорхойгүй ч ямар ч гэсэн дахиад нэг шалгалт.
 

“Эмэгтэйчүүд дотуур хувцсандаа мөнгө нуудаг гэсэн” гэж бодсон жуулчин дотуур өмдөндөө мөнгөө нуулаа. 29 мянган евро гэдэг бага мөнгө биш. Ядаж байхад 500-гаас гадна 50-тын дэвсгэр олон байлаа. Хэт их мөнгө хийвэл баригдана гэж бодсон эр үлдсэн 10 мянган евро, 14.6 мянган рубль, 236.5 мянган монгол төгрөгийг ачаандаа нуужээ.
 

Гэвч гаалийн нохой ачаан дахь мөнгийг үнэрлээд олчихлоо. Дараа нь гаалийнхан өмдөн доторх мөнгийг нь олсноор баяжих хүсэл нь талаар болжээ.

Буриадын Гаалийн газраас “Хэрэгтнээс 44 мянган ам.доллартой тэнцэх хэмжээний мөнгө хураан авсан. Хууль ёсоор 10 мянган ам.доллароос илүү мөнгө хил нэвтрүүлэх бол мэдэгдэх ёстой байдаг. Эрүүгийн хэрэг үүсгэн, шалгаж байна” гэж мэдэгдлээ.