Хөл нь хайрагдсан 2 настай охины эгч архи ууж, айлд хоносон байжээ

Дорнод аймгийн Хэрлэн сумын I багийн нутаг дэвсгэрт энэ сарын 4-ний өдөр хоёр настай охин гэртээ осгосон байдалтай олджээ. Иргэн Э.А гэгч төрсөн дүүгийн охин болох А-г энэ сарын 3-ны орой гэртээ цоожилж үлдээсэн бөгөөд маргааш өдрийн 16:00 цагийн орчимд айлынх нь хүмүүс цагдаагийн байгууллагад дуудлага өгснөөр охинг цоожтой гэрээс гаргаж авсан байна.

Болсон явдлын талаар Дорнод аймгийн Цагдаагийн газрын Гэр бүлийн хүчирхийлэл, хүүхдийг гэмт хэргээс урьдчилан сэргийлэх ахлах мэргэжилтэн, цагдаагийн ахлах дэслэгч Ц.Нэргүйгээс тодрууллаа. 

-Хэрлэн суманд хоёр настай охин гэртээ цоожилж үлдээснээс үүдэн хөл, гар нь хайрагдсан гэдэг мэдээллийг авлаа. Хүүхдийн биеийн байдал гайгүй юу?

-Болсон явдлын талаар та бүхэн мэдэж байгаа байх. Охин өвлийн хүйтэнд галгүй гэрт удаан хугацаанд байсан учраас гар, хөл нь хайрагдсан байсан. Эмчид үзүүлсэн ч ханиад, хатгаа хүрээгүй байсан учраас охинг “Anna home” хүүхдийн асрамж, халамжийн төвд хүргэсэн.

-Ямар учраас ар гэрийнхэн нь охинг удаан хугацаанд харгалзах хүнгүй гэртээ орхиж явсан бол?

-Нагац эгч нь энэ сарын 3-ны орой охинг гэртээ үлдээгээд гарсан юм билээ. Найзуудтайгаа архи ууж, согтууруулах ундааны зүйл хэрэглэж, тэгээд өөр айлд хоносон байсан. Нөхрийгөө гэртээ ирсэн байх гэж ойлгосон гэж мэдүүлж байгаа.

-Охины аав, ээж нь нагац эгчдээ үлдээсэн байсан гэсэн үг үү?

-Тийм. Охины ээж хөдөө ажлаар явсан юм билээ. Тэгээд эгчдээ үлдээсэн байсан.

-Охины нагац эгч Э.А-г цагдаагийн байгууллага шалгаж байгаа юу?

-Эрүүгийн хэрэг үүсгэн шалгаж байна. Үүнээс илүү дэлгэрэнгүй мэдээлэл өгөх боломжгүй байна.

Охины ээж хөдөө ажлаар яваа ба одоогоор Дорнод аймагт ирээгүй байна гэх мэдээллийг эх сурвалж өгч байна. Охины ээжтэй цагдаагийн байгууллага холбоо тогтоохоор ажиллаж байгаа аж.