"Сайн ломбард"-ыг дээрэмдсэн этгээдүүд мөнгөн дэвсгэрт шатааж, мөрөө баллахыг завджээ

Баянзүрх дүүргийн 17 дугаар хорооны нутаг дэвсгэрт байрлах Цахлайн тойргийн автобусны буудлын ойролцоо үйл ажиллагаа явуулдаг “Сайн ломбард” барьцаалан зээлдүүлэх газарт өнгөрөгч гуравдугаар сарын 30-ны өдөр Э, Д, М нар нь бүлэглэн хүч хэрэглэн нэвтэрч, бэлэн 11.588.000 төгрөг, 1087 иргэний барьцаалан зээлдэх гэрээтэй 1561 ширхэг 302.946.000 төгрөгийн үнэ бүхий үнэт эдлэлүүдийг дээрэмдэн авч, хохирол учруулсан гэмт хэрэг үйлдэгдсэн тухай өмнө нь бид мэдээлсэн. 

Дээрх гэмт хэргийг эрхэлсэн тодорхой ажилгүй, урьд дээрэмдэх, хулгайлах, бусдын эд хөрөнгийг устгаж гэмтээх, хүний амь нас хөнөөх гэмт хэргүүдэд ял шийтгэгдэж байсан 34 настай Д, 32 настай М, 35 настай Э нар нь бүлэглэн үйлдсэн болохыг Нийслэлийн цагдаагийн удирдах газрын Мөрдөн шалгах газрын Хүнд гэмт хэрэгтэй тэмцэх хэлтэс, Баянзүрх дүүрэг дэх цагдаагийн газрын алба хаагчид хамтран илрүүлжээ.

Яллагдагч Э, Д, М нар нь гэмт хэргийн замаар олсон эд зүйлсийг Чингэлтэй дүүргийн 10 дугаар хорооны нутаг дэвсгэрт нуусан байсныг илрүүлэн, алдагдсан эд зүйлсийг эд мөрийн баримтаар хураан авсан байна.

Сэжигтэй этгээдүүд нь гэмт хэрэг үйлдэх үедээ өмсөж явсан хувцас, хэрэглэл болон эд мөрийн баримт, цүнх, бээлийний содон шинж тэмдгийг устгах, ломбардад барьцаанд тавигдсан иргэдийн эд зүйлийг битүүмжилсэн гялгар уут, задгай болон боодолтой шинэ мөнгөн дэвсгэртүүдийг Чингэлтэй дүүргийн 10 дугаар хорооны нутаг дэвсгэрт шатааж, ул мөрөө нуун дарагдуулах үйдэл хийсэн болох нь тогтоогдож мөрдөн шалгах ажиллагааг явуулж байна.