Допингийн хариу сольдог байж болзошгүй гэх ХЭРГИЙГ ХААЖЭЭ

Монголын үндэсний бөхийн холбоо (МҮБХ) өнгөрсөн долоо хоногт бөхчүүдийн допингтой холбоотой хэргийг татаж хянуулах талаар Нийслэлийн Прокурорын газарт хандсан юм. 

Тэгвэл нийслэлийн Прокурорын газраас МҮБХ-нд допингтой холбоотой хэргийг хаасан талаар албан бичиг ирүүлэн, мэдэгджээ. 

МҮБХ-ноос энэ талаар "Нийслэлийн Прокурорын газраас ирүүлсэн албан бичигт допингтой холбоотой хэргийг 2020.10.15-ны өдөр хэрэгсэхгүй болгож, хааж шийдвэрлэсэн гэсэн хариу ирүүллээ. Гэтэл Авлигатай тэмцэх газар (АТГ) 2020.10.18-ны өдөр хэргийг шалгаж байгаа тухай албан бичгийг МҮБХ-нд ирүүлсэн болно" гэсэн мэдээлэл өглөө. 

Сануулахад, 2020 оны аравдугаар сард бөхчүүдийн гаргасан гомдолтой холбоотойгоор АТГ-аас Үндэсний их баяр наадмыг зохион байгуулах хорооны удирдлага бүхий зарим хүмүүст хэрэг бүртгэл нээж, мөрдөн шалгах ажиллагаа эхлүүлсэн талаар АТГ мэдээлж байсан юм. 

Хамгийн ноцтой нь, мөрдөн шалгалтын явцад "Бөхчүүдийн допингийн шинжилгээний хариуг сольдог байж болзошгүй" гэх нөхцөл байдал илэрсэн ба тухайн үед "Улсын аварга Э.Оюунболд, Улсын начин Д.Цэрэнтогтох нарын гомдлыг шалгаж байгаа. Шалгалтын явцад холбогдох зарим албан тушаалтан бөхчүүдийн допингийн шинжилгээний хариуг сольдог байж болзошгүй нөхцөл байдал илэрсэн нь үнэн. Тиймээс сүүлийн 10 жилийн хугацаан дахь допингийн шинжилгээ өгсөн бөхчүүдийн хариу зөрсөн, сольсон эсэх асуудал байгаа эсэхийг нягталж, мөрдөн шалгах ажиллагааг өргөн хүрээнд үргэлжлүүлж байна" гэсэн мэдээллийг албаны эх сурвалж өгч байсан юм. 
 

МҮБХ-ноос нийслэлийн Прокурорын газрын ерөнхий прокурорт хүргүүлсэн мэдэгдлийг эргэн сануулъя.

Допингтой холбогдох хэргийг татаж хянуулах тухай 

(2021 оны гуравдугаар сарын 24)

"Монголын үндэсний бөхийн холбоо нь үндэсний бөхийг түгээн дэлгэрүүлэх, хөгжүүлэх, бөхчүүдийн эрх ашгийг хамгаалах үндсэн эрх үүрэгтэй байгууллага юм. Авлигатай тэмцэх газар (АТГ)-аас 2019 оны арваннэгдүгээр сарын 11-ний өдөр олон нийтэд хандан өөрийн байгууллагад шалгагдаж байгаа эрүүгийн хэргүүдийн талаарх мэдээлэл өгөхдөө 2009-2018 онд Улсын баяр наадамд шөвгөрсөн бөхчүүдийн 38 нь зөрчил гаргасан, түүнд холбогдуулж, Биеийн тамир, спортын газрын нэр бүхий албан тушаалтнуудад холбогдуулан эрүүгийн хэрэг үүсгэн шалгаж байгаа талаар анх мэдээлсэн бөгөөд тэр цагаас хойш эрүүгийн хэрэг хэрхэн шийдвэрлэгдсэн нь тодорхой бус байсаар өнөөдрийг хүрлээ.  

Допингтой холбоотой энэ хэргийн талаарх мэдээлэл өгөхийг бөхчүүд болон бөх сонирхогчдоос МҮБХ-нд болон миний нэр дээр 20 гаруй хүсэлт, гомдол ирээд байгаа тул МҮБХ-ноос АТГ-т дээрх шалгагдаж байгаа хэргийн талаар 2020 оны нэгдзгээр сарын 30-ны өдрийн 01/13 тоот, гуравдугаар сарын 19-ний өдрийн 01/25 тоот, 2020 оны аравдугаар сарын 13-ны өдрийн 01/170 тоот албан бичгүүдээр тус тус хэрэг хэрхэн шийдвэрлэгдсэн талаарх мэдээлэлийг авахаар хандахад “...Нууцлалыг хангах үүрэгтэй, мэдээлэх боломжгүйг мэдэгдье” гэсэн нэг л хариуг бидэнд хуулбарлан өгсөөр байна. Харин МҮБХ АТГ-аас мөрдөн шалгах ажиллагаа явуулж байгаа эрүүгийн хэрэг дээрээ “Нотлох баримт ирүүлэх” талаарх албан бичгийн хариуг  тухай бүрт нь шуурхай өгч байсан болно. 

Гэтэл бөхчүүд болон олон нийтийн дунд дээрх эрүүгийн хэргийн талаар элдэв хардлага гарч, хэргийг хэрхэн шийдвэрлэсэн тухай мэдээлэлийг биднээс байнга шаардаж, нэхэж байгаа бөгөөд удахгүй болох МҮБХ-ны Цэцдийн зөвлөлийн хурал, "Их Эе"-ийн хурал, Ардын хувьсгалын 100 жилийн ойн  бэлтгэл ажлуудыг хангахтай холбогдуулан зохион байгуулагдах уулзалт, хурлууд дээр уг асуудал дахин сөхөгдөж яригдах нь тодорхой болоод байна.

Иймд допингтой холбоотой дээрх эрүүгийн хэргийг Та татаж хянан, нууцийн зэрэглэлд оруулаагүй л бол, хэрхэн шийдвэрлэгдсэн талаарх хариуг манайд өгнө үү. 

Жич: АТГ-аас МҮБХ-нд ирүүлсэн болон тус газар руу явуулсан албан бичгүүдийн хуулбаруудыг хавсаргав" гэжээ. 

Хүндэтгэсэн: ТЭРГҮҮНИЙ ҮҮРГИЙГ ГҮЙЦЭТГЭГЧ Ц.МАГАЛЖАВ