Бүх гэрээг цахимжуулж, БИРЖЭЭР худалдаалсан нүүрсийг хилээр гаргана

Монгол Улсын Засгийн газрын өнөөдрийн хуралдаанаар Монгол Улс нүүрсээ ам үнээр биш хил үнээр экспортод гаргахаар шийдвэрлэсэн талаар /ЭНД/ мэдээлсэн.

Тэгвэл Монголд орж ирэх валютыг нэмэгдүүлэх, нүүрсний экспортод хийж буй дараагийн зохицуулалт нь бүх гэрээг цахимжуулж, гэрээний дагуу хилээр экспортод гаргахаар болжээ.

Энэ талаар Эдийн засгийн хөгжлийн сайд Ч.Хүрэлбаатар "Уурхай дээр олборлогдсон нүүрс хилээр ачигдаад гарах энэ бүх үйл ажиллагааг цахимжуулж, бүртгэлжүүлнэ. Тэр гэрээн дээр суусан нөхцөлийн дагуу л тухайн нүүрс экспортлогдох учиртай. Ингэж чадвал уурхайн амнаас хил хүртэлх дунд байгаа янз бүрийн зөрчил, энд тэнд нь алдагддаг, хууль зөрчигддөг бүх зүйлийг цахимжуулах бүрэн боломжтой.

Ингэж чадвал бидний хувьд гарч байгаа нүүрс болгоныг, хэчнээн тонн нүүрс, ямар компанийн ямар гэрээгээр, ямар нөхцөлтэй гарч байгаа вэ гэдгээ бүгдийг нь бүртгэлжүүлж, мэдэх бүрэн боломж бүрдэж байгаа. Үүнийг тогтоолдоо оруулж ирж өгч байгаа.  Ингэж чадвал ихээхэн дэвшил болно гэж үзэж байгаа. Энэ ондоо багтаад хийгдээд явна.

Дараагийн зохицуулалт нь гэрээнүүдээ ил тод болгоно. Бүх нүүрсийг биржээр зарагддаг тогтолцоо руу шилжиж байгаа. Яагаад гэхээр Монголын нүүрсийг авъя гэдэг санал олон талаас ирдэг. Тэгтэл энэ нь нэг гэрээгээр хийгдээд явчихаар бүх талд боломж нь гарч ирэхгүй байна гэж үзэж байгаа. Харин биржээр борлуулагдсан тохиолдолд олон худалдан авагч орж ирээд Монголын зарагдаж байгаа нүүрсний үнэ өсөх боломжтой. Нөгөөтээгүүр элдэв хардлага сэрдлэг алга болно.

Тэгэхээр нүүрсээ биржээр худалдах тогтолцоо руу шилжиж, 2023 оны нэгдүгээр сараас зөвхөн биржээр арилжаалагдсан нүүрс экспортод гарна гэдэг зохицуулалтыг хийж байгаа.

Энэ зүйл бол валютын урсгалыг сайжруулах зорилгоор урьд өмнө хийгдсэн гэрээ, оптет гэрээ, мөн бэлэн мөнгөөр, валютаар орлогдох гэрээний нүүрс тээвэрлэлт, экспорт дээр уян хатан зохицуулалт хийх замаар валютынхаа урсгалыг нэмэгдүүлье гэдэг үүрэг чиглэл өгөгдөж байна" гэв.