ХЭН ЮУ ХЭЛЭВ I Хаанаасаа 30% гэдэг ойлголт гаргаж ирснийг ойлгохгүй байна

“Хэн юу хэлэв” булангийн энэ удаагийн дугаарт ЗГХЭГ-ын дарга Н.Учрал, Эрчим хүчний сайд Б.Чойжилсүрэн, УИХ-ын гишүүн Д.Батбаяр нарын байр суурийг онцлов.

ЗГХЭГ-ын дарга Н.Учрал:

-Төрийн өмчийн болон орон нутгийн өмчит компанийг 50 хувь цомхотгоно гэж Ерөнхий сайд чуулганы үеэр хэлсэн. Үүнийг хэрэгжүүлэхийн тулд нэгд хууль хэрэгтэй. Хоёрт, хуулинд заасан таван чиглэлээс өөр тохиолдолд компани байгуулахгүй гэдгийг хатуу хуульчлах ёстой. Хууль батлагдсаны дараа төрийн өмчит компани дээр баримтлах чиглэлийг гаргахдаа аль компаниудыг нэгтгэх юм, алийг нь татан буулгах юм, алийг нь яаж хувьчлах юм гэдгээ тогтох хэрэгтэй. Ингэж шийдвэрлэхгүй бол төрийн өмч гэдэг чинь эзэнгүй болчихоод байна.Төрийн өмчит компаниуд алдагдалтай ажилладаг мөртлөө цалингаа нэмээд байдаг, хэн нэгний "гар хөл" томилогддог болчихлоо. Тэгэхээр 50 хувь цомхотгоно гэсэн үгэндээ Ерөнхий сайд эзэн болмоор байна.

Эрчим хүчний сайд Б.Чойжилсүрэн:

-Эрчим хүчний өртөг 280 төгрөг болчихоод байгаа. 2024 оны арваннэгдүгээр сарын 15-ныг хүртэл айл өрхийн цахилгааны тариф 1 Квт нь 140 орчим төгрөг байсан. Эрчим хүчний зохицуулах хорооноос өртөгт нь ойртуулах шийдвэр гаргаснаар эхний 150 Квт хүртэлх хэрэглээг 175 төгрөгөөр, 150-300 Квт хүртэлх хэрэглээг 256 төгрөгөөр, 300 Квт-аас дээш хэрэглээг 280 төгрөг болгож, өртөгт нь ойртуулсан. Эрчим хүчний зохицуулах хороо үүнийгээ тайлбарласан, би тэгж яриагүй. Хүмүүс буруу ойлгоод байна. Санаатай ч юм уу, санаандгүй ч юм уу, эрчим хүчний үнийг 30 хувиар нэмэгдүүлсэн гэдэг ойлголт төрүүлээд, одоо болохоор 30 хувиас илүү нэмэгдүүлсэн гэдэг шүүмжлэл явж байна. Хаанаасаа 30 хувь гэдэг ойлголт гаргаж ирээд, шүүмжлээд байгааг ойлгохгүй байна.

УИХ-ын гишүүн Д.Батбаяр:

-Ураны зах зээл дэлхийд том бөгөөд ач холбогдолтойд тооцогдож байгаа. Энэ тойрогт Монгол Улс одоо л орох гэж байна. Ингэснээр манай улсын тусгаар тогтнол, эдийн засгийн баталгаа нэмэгдэж байгаа. Ер нь аливаа улс орон алслагдаад, хаагдаад, өрөөний буланд шигдээд байх тусам хувь заяа нь улам л бүрхэг болно. Харин аливаа үйл явдлын дунд орж, бусад улс орнуудтай хамтран нийлж хөдлөх тусам бидний тусгаар тогтнол улам бэхжиж байдаг. Энэ утгаараа ураны төсөл чухал ач холбогдолтой байлаа. Одоо бол улс төр хийх цаг биш. Ажил хийх цаг, шийдвэр гаргах цаг шүү дээ. Шийдвэр гаргахдаа зүгээр нэг ярьж, бусдад таалагдахдаа гол биш, хариуцлагатай байх ёстой.