Ц.Даваасүрэн: Газрын тосны бүтээгдэхүүн экспортлогч орон болно

2013 оны УИХ-ын хаврын чуулганы хугацаанд Төсвийн байнгын хороо 30 хууль, УИХ-ын 12 тогоолын төсөл хэлэлцэж улмаар УИХ-ын чуулганы нэгдсэн хуралдаанаар батлуулжээ. Тухайлбал, Монгол Улсын 2014 оны төсвийн хүрээний мэдэгдэл, 2015-2016 оны төсвийн төсөөллийн тухай хуулийг хэлэлцэж баталсан байна. Хууль батлагдсанаар төсвийн ерөнхийлөн захирагчдын 2014 оны төсвийн хязгаар болон 2014 оны төсвийн тухай хуулийн төсөл, холбогдох тооцоо судалгааны үндсэн суурь үзүүлэлт болж, тэдгээрийг боловсруулах нөхцөлийг бүрдүүлэх эрх зүйн үндэслэл бий болсон байна.

Ирэх онд дотоодын нийт бүтээгдэхүүний бодит өсөлтийг 14.7 хувьд хүргэж хэрэглээний үнийн индексийн дундаж төвшин 6 хувьд барина. Ингэснээр Монгол Улсын нэгдсэн төсвийн тэнцвэржүүлсэн орлогын хэмжээ 7270 тэрбум төгрөг буюу дотоодын нийт бүтээгдэхүүний 35 хувьд хүрнэ. Мөн Улсын нэгдсэн төсвийн нийт зарлагын дээд хэмжээ 7686,3 тэрбум төгрөгт хүрч, нэгдсэн төсвийн тэнцвэржүүлсэн тэнцэл 416,3 тэрбум төгрөгийн алдагдалтай гарах юм. Ирэх жил Улсын нэгдсэн төсвөөр 2299,5 тэрбум төгрөгийн хөрөнгө оруулалт хийж, Улсын нийт өрийн хэмжээ өнөөгийн үнэ цэнээр 8314 тэрбум төгрөг байхаар аж.

Төсвийн байнгын хороогоор хэлэлцэгдэж чуулганы хуралдаанаар батлагдсан бас нэг чухал асуудал нь зөвхөн стандартын дагуу хийгдэж угсрахад бэлэн болсон модон барилгын угсармал хийц болон тууш чиглэлийн нимгэн давхаргатай ОСБ хавтанг импортлоход гаалийн болон нэмэгдсэн өртгийн албан татвараас чөлөөлөхөөр холбогдох хуульд нэмэлт өөрчлөлт оруулсан юм. Мөн бөөрөнхий мод, гуалин, зүсмэл материал, ойжуулалт, цэцэрлэгжүүлэлт, ойн аж ахуйн арга хэмжээний ажлыг нэмэгдсэн НӨАТ-аас чөлөөлөхөөр болжээ.

Дотооддоо шатахуун үйлдвэрлэх ажлын эхлэл болгож газрын тосны бүтээгдэхүүн болох авто бензин, дизель болон шатамхай хийг газрын тос, нүүрс болон занараас гаргаж авахтай холбоотой газрын тосны үйлдвэр байгуулахаар гадаадаас итпортлох технологийн тоног төхөөрөмж, түүний сэлбэг, тусгай зориулалтын барилгын материалыг Гаалийн болон НӨАТ-аас чөлөөлөхөөр мөн хуульчилсан байна. Энэ нь 2013 оны 6 дугаар сарын 7-ны өдрөөс 2018 оны 12 сарын 31-ний өдөр хүртэлх хугацаанд хэрэгжих юм. Дээрх хууль батлагдсанаар манай улсын эдийн засаг, нийгмийн тогтвортой хөгжилд онцгой ач холбогдол бүхий газрын тосны бүтээгдэхүүнийг дотооддоо газрын тос болон занараас гарган авах технологийн богино хугацаанд ажмилттай нэвтрүүлэн нутагшуулж стратегийн ач холбогдол бүхий бүтээгдэхүүний хувьд бусад улсаас хараат бус болох, инфляцийг тогтвортой байлгах, газрын тосны бүтээгдэхүүн экспортлогч орон болох юм гэж парламентын гишүүн Ц.Даваасүрэн хэллээ. Түүнчлэн их хэмжээний хөрөнгө оруулалт шаардсан, өндөр эрсдэл бүхий үйлдвэрийг төр, хувийн хэвшлийн хамтын ажиллагааны дүнд байгуулснаар дараа дараагийн хүнд үйлдвэр, өндөр технологийн салбарыг хөгжүүлэх нийгэм, эдийн засгийн суурь бий болох ач холбогдолтой хэмээн хэлж байна.