Н.Байгалмаа: Өнөөдөр над шиг жаргалтай Монгол байна уу

Н.Байгалмаа хэмээх бүсгүй тэмээгээр Европ руу гурван жил аялахаар болсон тухайгаа мэдэгдээд байсан билээ. Түүний аяллын зорилго нь эх орноо сурталчлах бөгөөд анх наймдугаар сард аялах гэж буйгаа өөрийн цахим хуудсаараа зарлаж байсан юм.

Аяллын маршрутаа өдөрт 30 км зам туулахаар төлөвлөсөн гэдгээ мэдэгдээд байсан. Аяллын баг нь гурван монгол, Бразил, АНУ-ын  гурван хүний бүрэлдэхүүнтэй гэнэ. Тэд Англи, Казахстан, Узбекистан, Туркменистан, Иран, Турк зэрэг Европын 12 орноор аялах юм. 

Түүний аяллын тухайд сонссон хүмүүс амжилт хүсэж байсан бол эсрэгээрээ зарим нэг нь амьтан зовоолоо гэх мэт сэтгэгдэл бичиж байсан юм. Тэгвэл Н.Байгалмаа бүсгүй өөрийн цахим хаягаараа сэтгэгдлээ илэрхийлжээ. Тэрбээр  “Тиймээ , Монгол хүмүүс бүгд малдаа санаа зовдог олон олон санаа зовсон хүмүүс надад сайн , муу үг дайх юм...Би хаана очих юу хийх ёстойгоо маш сайн мэдэж байгаа.Би ч тэмээнүүддээ өөрийн биеэс дутахааргүй хайртай... Манай тэмээд дэлхийд хоёр бөхт тэмээ, Монгол малын хатуужил, чадварыг тамгалан харуулах өдөр ирнээ
Мэдээж амар биш....Иймд та нар минь надад манай багт итгээд хүлээж суугаарай...
Луу ахлагчтай ийм сүрлэг сайхан тэмээдийг өмнө би харж байгаагүйн байна...Яг өнөөдөр бол над шиг аз жаргалтай Монгол байна уу” хэмээжээ.

Н.Байгалмаа анх австрали хүн Монголоос Унгар хүртэлх замыг морьтой туулсан тухай сонсож, энэхүү аяллын санааг гаргасан байна. Тэрбээр аялалдаа өнөөдрөөс гарч байгаа аж. Жавхаалаг Монгол бүсгүйнхээ аялалд нь амжилт хүсье. Аян зам нь өлзийтэй байг.

Б.Янжиндулам

www.zindaa.mn