“Бруклиний ногоон хатагтай” олныг гайхшруулж байна
Элизабет Итон Розенталь гэх эмэгтэй сүүлийн 20 жилийн турш ногоон өнгийн хувцас өмсчээ. “Бруклиний ногоон хатагтай” гэгдэх болсон түүний үс, хумс, нүүр будалт гээд бүх зүйл нь ногоон. Гэрийнх нь бүх тавилга, ор хөнжлийн даавуу, бүр халбага сэрээ нь хүртэл ногоон. Ногоон өнгөний бүхий л төрлөөр гэрээ цогцлоосон тэрбээр “Ногоон бол хамгийн сайхан өнгө. Эерэг, гайхалтай өнгө” гэж ярьдаг. Элизабет “ногоон амьдрал”-ын хэлбэрээ юугаар ч солихгүй гэнэ. Тэрбээр энэ жил 75 настай.
Элизабетын нөхөр нь ч түүнийг даган ногоон өнгөнд дуртай болжээ. Эмэгтэй Канадаас Нью-Йоркт нүүж ирснийхээ дараа байгалийг маш ихээр үгүйлэх болж, хумсаа ногоон өнгөөр буддаг байж байгаад сүүлдээ “бүхэлдээ ногоон” болсон байна. Элизабетыг одоо хотынхон нь төдийгүй дэлхий даяар мэддэг болжээ. Тэрбээр хүмүүс байгальд хайртай байж, эко амьдралыг илүүд үздэггүйг гайхдаг гэнэ. Түүнийг гудамжаар явахад нь “Хөөх, та яг л миний дуртай өнгөөр хувцасласан байна” гэж хэлдэг хүмүүст Элизабет “Тэгвэл та өөрөө ногоон өнгийг сонгоогүй л байна шүү дээ” гэж хэлдэг аж.
Сонирхуулахад, Ирландад жил бүрийн гуравдугаар сарын 17-нд болдог Гэгээн Патрикийн өдрөөр хүмүүс ногоон өнгийн хувцас өмсдөг уламжлалтай. Харин өдөр бүр ногоон өнгийн хувцас өмсч, эд хэрэглэл, гэр орон нь бүхэлдээ ногоон байдаг Элизабет Итон Розенталаас хүмүүс “Энэ өнгөнөөс залхах үе танд байдаг уу” гэж асуухад тэрбээр “Өө, үгүй дээ. Хэзээ ч залхахгүй. Харин ч ногоон өнгө надад улам илүү таалагдах болсон” гэж хариулдаг байна.
О.Саша
Холбоотой мэдээ
Сэтгэгдэл ( 0 )