Д.Сумъяабазар: 1072 хувьцаа эдийн засгийн эргэлтэд ороход бэлэн болсон

УИХ-ын чуулганы нэгдсэн хуралдаанаар Засгийн газраас өргөн мэдүүлсэн Монгол Улсын эдийн засаг, нийгмийг 2020 онд хөгжүүлэх үндсэн чиглэл батлах тухай УИХ-ын тогтоолын төслийг 60.5 хувийн саналаар дэмжиж, Эдийн засгийн байнгын хороонд шилжүүллээ. Хэлэлцүүлгийн үеэр УИХ-ын гишүүд Засгийн газрын гишүүдээс сонирхсон асуултдаа хариулт авсан юм.

Тухайлбал, УИХ-ын гишүүн С.Бямбацогт “2020 он энэ Засгийн газрын мөрийн хөтөлбөрөө биелүүлэх сүүлийн жил. Тиймээс биелээгүй зорилтоо биелүүлж ажиллах жил. 1072 хувьцааг амь оруулна гэсэн хэрхэн биелэх вэ. Оюутолгой, Тавантолгойн цахилгаан станц барих ажил хэрхэн биелэх вэ. Үйлдвэржүүлэх бодлого хэрхэн биелэх вэ” хэмээн асуухад УУХҮ-ийн сайд Д.Сумъяабазар “Тавантолгойн бүтээн байгуулалттай дэд бүтэц салшгүй холбоотой. Засгийн газраас Гашуунсухайтын төмөр замын бүтээн байгуулалтыг 3-4 сарын дараа эхлүүлэхээр ажиллаж байгаа. Энэ “Эрднэс Тавантолгой” компанийг олон улсын хөрөнгийн бирж дээр гаргах ажилтай холбоотой. Яамны зүгээс Тавантолгойгоос Хангимандал руу концессийн гэрээгээр 450 орчим км хүнд даацын автозам барих асуудлыг Засгийн газраар оруулахаар бэлтгэж байна. Энэ зам ашиглалтад орсноор улсын эдийн засаг тэлнэ. Мөн нүүрс боловсруулах үйлдвэрийг барих ажлыг хийхээр төлөвлөөд байна. Харин “Эрдэнэс Тавантолгой”-н IPO хийх ажлыг олон улсын шаардлага хангасан байдлаар хийх хэрэгтэй байгаа. Тавантолгойг улс төрөөс ангид байлгаж, бизнес хийх боломжийг нь нээж өгөх хэрэгтэй. 1072 хувьцааг одоогийн үнэлгээгээр хоёр их наяд төгрөг болдог. Үндсэндээ 780 орчим сая ам.долларын үнэт цаас эдийн засгийн эргэлтэд ороход бэлэн болсон” хэмээн мэдээлэл өглөө.