Иргэд амь насаараа хохирч, дарга нар хариуцлагаас зугтлаа

НЭГ СЭДВЭЭР - ШАХМАЛ ТҮЛШНИЙ ХЭРЭГЛЭЭ

Гадаад оронд химийн туршилтыг хулгана дээр хийдэг бол Монгол Улсад иргэд дээрээ туршиж байна. Бүр нийслэлийнхээ 1.4 сая иргэн дээр шүү. Онц байдал гэдэг л энэ байх.

Утаагүй түлшний нөлөөгөөр таван ч иргэн амь насаараа хохирч, хордсон иргэд цэргийн төв эмнэлгийн хордлогын тасгийг дүүргээд байхад дарга нар хаана байсан бэ. Ямартай ч хотын асуудлыг эрхэлсэн дарга С.Амарсайхан цагдаад сайжруулсан түлшнийхээ хор уршгийг үнэн бодитоор мэдээлсэн сэтгүүлчийг хуулиар  айлга гэдэг үүрэг өгч  байсан нь саяхны явдал. Өөр дээр нь хариуцлага ирэхэд тэрбээр “Шаардлагатай гэвэл буруутай хүмүүст хариуцлагын асуудал яригдаж л таараа” гэж өөрөөсөө бултуулсан ярилцлага өгөв. Харин түүний орлогч, “Тавантолгой түлш” компанийн ТУЗ-ийн даргын албан тушаалыг давхар хашдаг Ж.Батбаясгалан  утаагүй түлш олон лабораторийн шинжилгээгээр стандарт шаардлага хангасан талаар олон удаа ам гарсан даа. Гэвч таван хүн нас барсны дараа “Бидний мэдэх, мэдэхгүй асуудал байх вий гэдэг үүднээс гаднын лабораторид шинжлүүлэхээр дээж аваад, явуулсан байна” гэдэг мэдээллийг өгсөн. Үнэн хэрэгтээ Ерөнхийлөгч Х.Баттулга, Ерөнхий сайд У.Хүрэлсүх нар Улаанбаатар хотыг утааг бууруулах сайжруулсан түлшний үйлдвэрлэлийг хар толгойгоороо хариуцсан дарга нарт эргэлзсэндээ гадаадын лабораториор шинжлүүлэх чиглэл өгсөн болж таарав. Мөн Хотын дарга С.Амарсайхан та утаагүй түлшнийхээ үнэнийг нуугаагүй бол ийм олон эрдэнэт хүний амь эрстэх байсан болов уу.  

Хотын дарга С.Амарсайхан та утаагүй түлшнийхээ үнэнийг нуугаагүй бол ийм олон эрдэнэт хүний амь эрстэх байв уу!

Өчигдрийн байдлаар 30 гаруй хүн хордсон гэх албаны мэдээлэл байгаа ч зарим эх сурвалжийн хэлж буйгаар сайжруулсан түлшинд угаартсан иргэн 50 гарсан бололтой. Уржигдар нас барсан иргэн дөрөв байсан бол өчигдөр тав болсон. Ийнхүү нас барсан иргэдийнхээ статистикийг тоолж суух зуур сайжруулсан түлш худалдаанд байсаар байгаа. Гэвч энэ асуудлыг хариуцсан нийслэлийн Засаг дарга бөгөөд Улаанбаатар хотын захирагч С.Амарсайхан, “Тавантолгой түлш” компанийн ТУЗ-ийн дарга Ж.Батбаясгалан, тус компанийн гүйцэтгэх захирал М.Ганбаатар нар сайжруулсан түлш стандартын шаардлага хангасан. Харин олон арван өвлийг гал галлан давж гарсан монголчууд галаа түлж чадахгүй байна гэдэг дүгнэлтийг танилцуулав. Гадаадад явуулсан шинжилгээний хариу нь нисээд ирчихээгүй л байлтай. Уг нь дарга нарын итгэл хүлээлгэсэн олон улсад бол нэг л хүнд хордлого илэрсэн тэр бүтээгдэхүүнийг бүгдийг нь зах зээлээс буцаан татдаг юм л даа. Монгол дарга бол хариуцлага үүрдэггүй, буруугаа бусад руу наадаг монгол л дарга юм. Олон хүн харамсалтайгаар амиа алдсан ч хариуцлагаа ухамсарлан хүлээдэггүй монгол дарга нарт  төрийн өндөрлөгүүдийн зүгээс гадаадын шинжилгээний хариунд үндэслэн хариуцлага тооцох байлгүй дээ, ирэх өдрүүдэд. Дахиж нэг ч Монгол хүн утаагүй гэх түлшинд угаартаж битгий амиа алдаасай билээ гээд л залбирч сууя даа.