СУРВАЛЖИЛГА: Дэлбэрэлтийн улмаас ЗУУХ ЗАД ТАТАГДАЖ, байшингийн хаалга эвдэрчээ

Сүүлийн өдрүүдэд сайжруулсан шахмал түлшийг тойрсон сөрөг асуудал хурцаар яригдаж, олны анхаарлын төвд байна. Шахмал түлш хэрэглэсний улмаас угаартсан гэх иргэдийн тоо албан мэдээллээр 100 хол давж, өчигдрийн байдлаар зургаан хүн угаартаж нас бараад байгаа юм.

Тэгвэл үүнтэй зэрэгцэн мөнөөх шахмал түлшийг хэрэглэсэн гэх айлын зуух дэлбэрсэн хэрэг өнгөрөгч шөнө гарсан нь Баянзүрх дүүргийн 27 дугаар хороонд болсон явдал байлаа.

Тухайн өдрийн 19.20 цагийн үед ирсэн шуурхай мэдээллийн дагуу манай сурвалжлах баг  газар дээр нь очиход тус хорооны 12 дугаар гудамжны 277 тоотод оршин суух иргэн Г.Жаргалсайханы нам даралтын зуух дэлбэрсэн байв. Биднийг очих үед ослын газрыг цагдаагийн бие бүрэлдэхүүн хамгаалалтад авч, үзлэг хийж байсан бөгөөд хэвлэлийнхийг дотогш оруулаагүй юм. Биднийг очсноос хойш төд удалгүй Нийслэлийн мэргэжлийн хяналтын газар болон Онцгой байдлын ерөнхий газрын мэргэжилтнүүд ирж, үзлэг хийлээ. Хэвлэлийнхэн хамар хашаанаас зураг, дүрсийг авч, мэдээлэл дамжуулсан билээ. 

Ингээд үзлэг дууссаны дараа цагдаагийн алба хаагчид хэрэг явдлын талаар ямар нэг тайлбар өгөөгүй бөгөөд зуух болон дээрээс нь хэрэглэсэн “Сайн” шуудайтай шахмал түлшийг авч явсан юм. Харин цагдаагийн бие бүрэлдэхүүнийг хэргийн газраас явсны дараа хэвлэлийнхэн тухайн айлын хашаанд орж, мэргэжлийн хяналтын ажилтантай уулзсан. Газар дээр нь ажилласан тэдний зүгээс хамтарсан үзлэг шалгалт хийсэн, ямар нэгэн урьдчилсан дүгнэлт хэлэх боломжгүй гэдгээс өөр тайлбар өгсөнгүй.

Иргэн Г.Жаргалсайханых нам даралтын, төслийн зуухаар халаадаг, хоёр өрөө бүхий үүдний хэсэг хаалгаар тусгаарлагдсан байшинтай аж. Үүдэн хэсэг буюу тампертаа зуухаа байрлуулсан байна. Тухайн дэлбэрэлт болох үед шахмал түлшээр галлаад 20 орчим минут л болж байжээ. Дэлбэрэлт болох үед байшинд нэг өндөр настан ой гарантай хүүхдийн хамт байсан бөгөөд азаар их дуу чимээнээр хөршийн залуу ирж, тэднийг цонхоор гарган, бэртэж гэмтэхээс аварсан байна.

Хүчтэй дэлбэрэлтийн улмаас зуух зад татагдаж, байшингийн хаалга эвдрэн, тамперын доод хэсгийн шавар цуурч, дээвэр нь хууларсан байв. Түүнчлэн байшингийн ойролцоо тэдний оймс, тавчик гэх мэт зүйлс тарсан байсныг дэлбэрэлтийн улмаас байшин дотроос шидэгдсэн гэдгийг гэрийн эзэн хэллээ.

Тухайн айл нь нам даралтын зуухыг хэрэглээд хоёр жил гаруй болж байгаа бөгөөд мэргэжлийн хүмүүсээр суурилуулсан гэдгийг ярьж байна. Энэ хугацаандаа нүүрс хэрэглэж, ямар нэгэн сөрөг зүйл гараагүй аж. Харин шахмал түлшийг саяхнаас хэрэглэжээ. Үүнээс гадна энэ өдөр хорооны ажилтан ирж, шахмал түлш түлэх аюулгүйн зөвлөгөө өгөөд гарын үсэг зуруулаад  явсан байна. Тиймээс ч гэрийн эзэн өөрөө зааврын дагуу зөв галласан гэдгийг хэлж байлаа. 

- "Би 17.30 цагийн үед зуухаа галлаад, гэрээсээ түр гарснаас хойш 30-аад минутын дараа пийшин дэлбэрчихлээ гэж над руу утсаар ярьсан.    

Манай пийшин нам даралтын, төслийн пийшин гэж явдаг. Зуухаа буруу суурилуулсан асуудал байхгүй. Яагаад гэвэл үүнийг хоёр жил хэрэглэсэн. Энэ жил гурав дахь жилдээ болж байна. Хоёрт гэвэл сангийн мэргэжлийн хүмүүсээр тавиулсан.

Одоо дулаахан байгаа болохоор өмнө нь түүхий нүүрс түлдэг байсан хэмжээнээсээ багаар хийсэн. Өдөр 15.00 цагийн үед хорооноос зөв хэрэглэх зааварчилгаа өгөхөөр ирсэн. Яг миний түлдэг л юм байна лээ. Эхлээд модоо асаагаад дараа нь нүүрсээ хийнэ. Яг зааврын дагуу л түлсэн. Галлагааны хувьд ямар нэг алдаа гараагүй гэж бодож байна. Манай зуух автомат хий авагчтай, ямар нэг хаалт хаасан зүйл байхгүй. Хэрвээ ийм юм болох байсан бол ноднин, уржинан тохиолдох л байсан. Яг юунаас болсныг үнэхээр хэлж мэдэхгүй байна. Түлшээ нүүрсний борлуулалтын цэгээс авсан" гэв.

ВИДЕО: