Саид Моллаид ИРГЭНШИЛ олгосон ЗАРЛИГ ба Хуулийн заалтууд!

Жүдо бөхийн 81 кг-ын жинд дэлхийд данстай бөх Саид Моллаи Монгол Улсын иргэншилтэй болсон нь энэ өдрүүдэд олны анхаарлыг татсан сэдэв болоод буй билээ. Сүүлийн гурван жил дэлхийн дэвжээнд медалийн төлөө зодоглосон тэрбээр Дэлхийн аваргын алт, хүрэл медальтан.

Ерөнхийлөгчийн Тамгын газраас мэдээлэхдээ “Монгол Улсын Үндсэн хуулийн Гучин гуравдугаар зүйлийн 1 дэх хэсгийн 9 дэх заалт, Харьяатын тухай хуулийн 19 дүгээр зүйлийн 1, 24 дүгээр зүйлийн 1 дэх хэсэг, өөрийнх нь хүсэлт, Гадаадын иргэн харьяатын газрын дүгнэлтийг тус тус үндэслэн Монгол Улсын Ерөнхийлөгч Х.Баттулга  2019 оны арваннэгдүгээр сарын 20-ны өдөр “Монгол Улсын харьяат болгох тухай” зарлиг гаргаж, Саид Моллаиг Монгол Улсын харьяат болгов” гэсэн байсан.

Германы Засгийн газраас Саид Моллаид  улс төрийн орогнол олгосноор Токиогийн олимпод Дүрвэгчдийн багийн нэрийн өмнөөс зодоглох боломжтой боллоо гэх мэдээлэл өнгөрсөн арваннэгдүгээр сард цацагдаж байв. Тус улс Саид Моллаид иргэншил олгох боломжгүй шалтгаанаа "Олон улсын дипломат харилцааны хэм хэмжээг зөрчихөд хүрнэ" гэж тайлбарласан байдаг.

Харин Саид Моллаин хувьд цаашдын спортын замналд нь, амьдралд нь орогнол биш иргэншил хэрэгтэй нь өнөөдрийн үйл явдлаар баталгаажиж байна. Түүнд хэрэгтэй ИРГЭНШИЛ-ийг нь Монгол Улс олголоо.

Тэгвэл Монгол Улсын Ерөнхийлөгч зарлиг гаргахдаа үндэслэн, тулгуурласан хуулийн зүйл заалтуудад анхаарал хандуулъя.

Монгол Улсын Үндсэн хуулийн гучин гуравдугаар зүйлийн 1 дэх хэсгийн 9 дэх заалт

Ерөнхийлөгч дараах  үндсэн бүрэн эрхийг хэрэгжүүлнэ:
 

• Монгол Улсын харьяат болох, харьяатаас гарах, тус улсад орогнох эрх олгох асуудлыг шийдвэрлэх;

Харьяатын тухай хуулийн 19 дүгээр зүйлийн 1,  24 дүгээр зүйлийн 1 дэх хэсэг
 

19 дүгээр зүйл.Монгол Улсын Ерөнхийлөгчийн эрх хэмжээ
 

Монгол Улсын Ерөнхийлөгч бүрэн эрхийнхээ хүрээнд дор дурдсан асуудлаар шийдвэр гаргана. 

•  Гадаадын иргэн, харьяалалгүй хүнийг Монгол Улсын харьяат болгох;

24 дүгээр зүйл. Иргэний харьяаллын асуудлаар гарах шийдвэр

1. Монгол Улсын харьяат болох, харьяатаас гарах, иргэний харьяаллыг сэргээн тогтоолгох хүсэлтийг зөвшөөрөх тохиолдолд Монгол Улсын Ерөнхийлөгч зарлиг, татгалзах тохиолдолд захирамж гаргана гэсэн зүйл, заалтуудыг тус тус үндэслэжээ.

ТЭГВЭЛ ХАРЬЯАТЫН ТУХАЙ ХУУЛЬД ӨӨР ЯМАР ЗҮЙЛ ЗААЛТ  БАЙДГИЙГ САНУУЛЪЯ
 

 9 дүгээр зүйл.Монгол Улсын харьяат болох нөхцөл
 

1.Монгол Улсын харьяат болохын тулд дараах нөхцөлийг хангасан байна:
 

• Амьжиргааны зохих чадвар, эх үүсвэртэй байх;
• Монголын ард түмний ёс заншил, төрийн албан ёсны хэл, Монгол Улсын Үндсэн хуулийн талаар зохих мэдлэг эзэмшсэн ба иргэний харьяатын асуудлаар өргөдөл гаргасан өдрөөс өмнө Монгол Улсын нутаг дэвсгэр дээр таваас доошгүй жил байнга оршин суусан байх;
• Монгол Улсын гадаадын иргэн, харьяатын асуудал эрхэлсэн төрийн захиргааны байгууллагаас энэ хэсгийн 1, 2-т заасан хүрээнд төрийн бодлогыг үндэслэн тогтоосон бусад тодорхой шалгуурыг хангасан байх;
• Энэ хэсгийн 2-т заасан хугацаанд гэмт хэрэг санаатайгаар үйлдээгүй байх;
• Монгол Улсын иргэн болсноор тус иргэний гадаад улстай тогтоосон харилцаа нь Монгол Улсын нэр хүнд, ашиг сонирхолд хохирол учруулахгүй байх гэж тус тус заажээ.

Саид Моллаин хувьд “Монголын ард түмний ёс заншил, төрийн албан ёсны хэл, Монгол Улсын Үндсэн хуулийн талаар зохих мэдлэг эзэмшсэн ба иргэний харьяатын асуудлаар өргөдөл гаргасан өдрөөс өмнө Монгол Улсын нутаг дэвсгэр дээр таваас доошгүй жил байнга оршин суусан байх” гэсэн заалтыг хангасан байх бодит боломжгүй.

Тэгвэл Харьяатын тухай хуулийн 9 дүгээр зүйлийн 3-т:

Монгол Улсын төлөө гарамгай гавьяа байгуулсан, эсхүл Монгол Улсад онц шаардлагатай мэргэжил, мэргэшил эзэмшсэн, шинжлэх ухааны аль нэг салбарт онцгой амжилт гаргасан буюу гаргах боломжтой гадаадын иргэнийг Монгол Улсын Ерөнхийлөгч энэ зүйлийн 1 дэх хэсгийн 1, 2-т заасан нөхцөлийг үл харгалзан Монгол Улсын харьяат болгож болно гэж заажээ.

Тэгэхээр Саид Моллаи манай улсын нутаг дэвсгэрт сүүлийн таваас доошгүй жил оршин суугаагүй ч, монгол хэл мэдэхгүй ч ирэх онд Токиогийн тэнгэрт Монголын далбааг мандуулах найдвар бүхий тамирчин гэдэг утгаар нь Ерөнхийлөгч зарлиг гаргажээ.