“Даян” нууранд цөмөрсөн автомашиныг татан гаргалаа

Л.Болд | Zindaa.mn
2020 оны 01 сарын 08

Баян-Өлгий аймгийн Сагсай сумын VI багийн нутаг дэвсгэрт аймгийн төвөөс баруун урд зүгт 178 км зайд “Даян” нууранд 10 тонн тоосго ачсан “Стивер” маркийн автомашин мөс цөмөрч осолдсон тухай дуудлагыг аймгийн Онцгой байдлын газарт 2019 оны арванхоёрдугаар сарын 1-нд ирүүлсэн. Дуудлагын дагуу аймгийн  Онцгой байдлын газар болон орон нутгийн 54 хүн, найман техник хэрэгсэлтэйгээр ажиллаж, машинтай нууранд живсэн нэг хүний цогцсыг гаргаж, хууль хяналтын байгууллагад хүлээлгэн өгсөн юм. 

Харин  2020 оны нэгдүгээр сарын 4-ний өдөр нуурын мөс зузаарч нэг метр хүрсэн тул автомашиныг татан гаргах ажиллагааг эхлүүлсэн. Тус ажиллагааг Онцгой байдлын газрын орлогч дарга, дэд хурандаа Б.Батбилэгээр ахлуулсан  нийт 38 хүн, найман техник хэрэгсэлтэйгээр явуулж, 10 тонн ачаатай автомашиныг татаж гарган, эзэнд нь хүлээлгэн өглөө. Аврагчид дөрвөн өдөр, гурван метрийн гүн, нэг метрийн зузаан шавартай, байгаль цаг агаарын хүндрэлтэй нөхцөлд ажилласан  гэж Онцгой байдлын ерөнхий газраас мэдээллээ. 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top