Малайзын хаанаас салсан Оросын миссийг заналхийлэх болжээ

“Москвагийн мисс-2015”-ын ялагч Оксана Воеводина Малайзын хаан байсан V Мухаммад Фарисаас салсныхаа дараа хүүгээ ганцаараа өсгөж, багагүй зовлон бэрхшээлийг туулж буй нэгэн. Тэгвэл орос бүсгүй өөрийг нь өөр хүнтэй явалдсан, ёс зүйгүй гэж буруутгахын зэрэгцээ хүүхдээ өөрийнхөө хүүхэд биш гэж үзэж татгалзсан Малайзын хааны тухай анх удаагаа ам нээжээ.

Бүсгүй Малайзын экс хаан өөр эхнэртэй байсныг дэлгэсэн байна. 2018 онд хийсэн тэдний сүр дуулиантай хуримаас хоёр хоногийн дараа тэрбээр нөхрөө өөр эмэгтэйтэй гэдгийг олж мэджээ. Боб гэж тэмдэглэсэн дугаар залгахад Оксана нөхрийнхөө америк найзыг гэж бодон утсыг нь автал нэгэн эмэгтэй хашхичиж, хааны эхнэр байна гээд дахиж нөхрийнх нь утсыг авахгүй байхыг тушаасан байна. Оксанагийн асуултад экс хаан хариулт хэлэлгүй өнгөрчээ.

Мисс бүсгүй 49 настай экс хааны эхнэр болохоор зөвшөөрөхдөө өөрийгөө сүүлчийн бүсгүй нь байна гэдэгт итгэлтэй байсан аж. 27 настай Оксанагийн хүү, найман сартай Леоныг Малайзын хаан асан өөрийнхөө хүүхэд гэж хүлээн зөвшөөрдөггүй билээ. Бүсгүй Мухаммадаас хүүтэйгээ ойр байхыг олон удаа гуйсан ч татгалзсан, доромжилсон хариу авсныхаа дараа хоёулхнаа аз жаргалтай амьдрахаар шийджээ.

Өдгөө Москвад амьдарч буй Оксанаг үл мэдэгдэх хүмүүс сүрдүүлж, байнга мөрдөж мөшгих болсноор тэрбээр гэрээсээ гарахаас ч айдаг болжээ. Гэхдээ заналхийлэл экс нөхрөөс нь биш Малайзын хааны ордны бусад хүмүүсийн зүгээс ирж байгаа гэж Оксана үзэж буй гэнэ.

Тэдний гэрлэлт жил гаруйхан хугацаанд үргэлжилсэн юм.