Япон жүжигчин Монголд аялсан номоороо шагнал хүртжээ

Японы хошин шогийн жүжигчин Вакабаяши Масаясү саяхан Японы Аялал жуулчлалын газраас жил болгон олгодог Сайто Шигэкигийн шагнал хүртсэн юм. Түүний Монгол, Исланд, Кубад аялсан тухайгаа бичсэн ном уншигчдын сонирхлыг ихэд татсан билээ.

Вакабаяши “Кубад социализм гэж юу байдгийг үзэхээр очсон. Харин Монголд нэг газраа суурин амьдардаггүй нүүдэлчдийг, Исландад байгалийн сайхныг үзэх гэж аялсан” гэж шагнал гардуулах ёслол дээр ярьлаа.

Тэрбээр “Яагаад Монголыг сонирхох болсон маань багадаа үзсэн баримтат кинотой холбоотой. Нэг газраа суурин амьдардаггүй, дандаа нүүж явдаг малчдын амьдралыг харсан минь балчирхан надад гүн сэтгэгдэл төрүүлсэн юм. Ингээд Монголын тухай ном зохиол уншиж эхэллээ. Унших тусам л Монголд очиж үзмээр санагдаад. Өргөн уудам тал нутаг хязгааргүй үргэлжилнэ гэж бодохоор үгээр илэрийлэхийн аргагүй нэг сонин мэдрэмж төрж байлаа. Ингээд гурван жилийн өмнө Монголд анх очиж үзлээ. Хээр талд очсон эхний өдрөөс л нэг тийм дотно, урьд өмнө ирж ч байсан юм шиг мэдрэмж төрөөд салдаггүй. Морь унаад давхихад сэтгэл уяраад нулимс унах гээд ч байх шиг. Японд харьж ирээд “Өвөг дээдэс минь Монголоос ирсэн байх. Би монгол цустай байж магадгүй” гэж бодоод DNA шинжилгээ хүртэл өгсөн. Харамсалтай нь хариу нь манай өвөг дээдэс хятад хүн болж таарсан” гэж ярьсан байна.