ЗАВХАН: "Омикрон" мөн эсэхийг орон нутагт тогтоох боломжгүй

Завхан аймгийн Шуурхай штабаас цаг үеийн нөхцөл байдалтай холбоотойгоор мэдээлэл хийлээ.

Энэ үеэр орон нутгийн иргэдийн ирүүлсэн зарим асуултад хариулт өгсөн юм. Иргэдийн зүгээс “Аймагт коронавируст халдварын омикрон хувилбар илэрсэн үү” гэх асуултыг ихээр ирүүлж байна.

Харин үүнд шуурхай штабын зүгээс “Сүүлийн өдрүүдэд улс төдийгүй орон нутагт халдварын тоо эрс нэмэгдэж байна. Өнгөрөгч 24 цагийн байдлаас харахад аймгийн хэмжээнд 253 тохиолдол бүртгэгдсэн. Аймгийн хэмжээнд хийгдсэн PCR шинжилгээг ХӨСҮТ рүү явуулж шинжлүүлж байгаа. Орон нутагт Омикрон хувилбар мөн эсэхийг шинжлэх боломж байхгүй. Улсын тархвар судлалын дүн мэдээгээс харахад орон нутгийн тархалтын 80 гаруй хувь нь Омикрон хувилбар байгаа гэсэн дүн гарсан” хэмээн ярилаа.