"Эрдэнэт" үйлдвэрээс Булган аймагт жил бүр 1 тэрбум төгрөг өгдөг

О.Шинэтуяа | Zindaa.mn
2022 оны 12 сарын 08
Орхон аймгийн нутаг дэвсгэрт үйл ажиллагаа явуулдаг "Эрдэнэт үйлдвэр" ТӨҮГ-аас Булган аймагтай хамтран ажиллах гэрээнийхээ дагуу жил бүр нэг тэрбум төгрөгийн санхүүжүүлэлт өгдөг байна.
 
Энэ нь тус аймгийн нутаг дэвсгэрээс авч буй усны жилийн төлбөр ажээ.  Учир нь Орхон аймгийн хүн ам монголдоо хамгийн холоос буюу 65 км-ийн зайтай байх Булган аймгийн нутаг дэвсгэр дэх Сэлэнгэ мөрнөөс цэвэр усаа татаж, хэрэглээний усаа хангадаг байна. Үүний төлбөр болгож "Эрдэнэт үйлдвэр" ТӨҮГ-аас Булган аймгийн орон нутгийн төсөвт жил бүр 1 тэрбум төгрөгийг төлдөг боловч сүүлийн үед энэхүү санхүүжилт удааширч, төлөвлөгөөт зарим нэг ажил гацах болжээ. Үүнтэй холбоотойгоор Булган аймгийн Засаг дарга Б.Ариун-Эрдэнэ , ИТХ-ын дарга Д.Эрдэнэбатаар ахлуулсан  Хангал, Орхон, Бугат, Сайхан сумын удирдлагууд Орхон аймагт ажиллаж, хамтын гэрээний ажлуудаа эрэмбэлэн зарим тулгамдаад байгаа асуудлаа ярилцсан байна.

Уулзалтын үеэр Булган аймгийн удирдлагуудын зүгээс "Саяхан байгуулагдсан оёдлын үйлдвэрийн үйл ажиллагааг бодлогоор дэмжин "Эрдэнэт үйлдвэр"-ийг оёмол хувцас хэрэглэлээр хангах боломж, гарцыг нээж өгөх", "Улсын төсөвт өртөг нь сууж чадаагүйтэй холбоотойгоор зогсонги байдалд орсон “Жаргалант зуслан”-гийн засварын ажлын санхүүжилтэнд тодорхой хөрөнгө оруулалт үзүүлэх", "Сайхан сумын 640 хүүхдийн Ерөнхий боловсролын сургуулийн барилгын засварын ажилд дэмжлэг үзүүлэх" зэрэг хүсэлтүүдийг "Эрдэнэт үйлдвэр" ТӨҮГ-ын удирдлагад уламжилжээ. 

Энэхүү хүсэлтэд  “Эрдэнэт үйлдвэр” ТӨҮГ-ын захирал Г.Ёндон "Манай үйлдвэр хамтын ажиллагааны гэрээний заалтын дагуу Булган аймагт жил бүр усны төлбөр болох 1 тэрбум төгрөгийг олгож ирсэн . Тиймээс цаашид уг санхүүжилтийг тасалдуулахгүй олгож байхыг зорьж байна. Үүнээс гадна Хангал суманд шинээр байгуулах "Эрдэнэт үйлдвэр"-ийн хаягдлын аж ахуйн өргөтгөлийн газрын асуудлыг үе шаттай шийдвэрлэх хэрэгтэй байгаа. Тиймээс хамтын ажиллагааны 2023 оны гэрээндээ үе шаттай хийгдэх ажлуудын төлөвлөгөөг нарийвчлан тусгаж, зайлшгүй шийдвэрлэх ажлуудаа урагшлуулах зүйтэй" хэмээн хариулт өгсөн байна. 

Сэтгэгдэл ( 2 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Үнэн(66.181.185.32) 2022 оны 12 сарын 08

Ёндон бол энэ 2ыг зажлахгүй залгина\n

0  |  0
1(64.119.25.199) 2022 оны 12 сарын 08

Ха ха тэгсэн байж улсад байга сүүл мушгидаг дарга нарыг нь шалгах хэрэгтэй юм байна даа

0  |  0
Top