В.Зеленский Франц, Германаас хүнд зэвсэг, техник хүсэв

Украины Ерөнхийлөгч Владимир Зеленский Лондонд айлчилж, Их Британийн Ерөнхий сайд Риши Сунактай хамтарсан тунхагт гарыг үсэг зуржээ.

Баримт бичигт Лондон Киевт тусламж үргэлжлүүлэн үзүүлэх тухай заажээ. 2022 оны хоёрдугаар сараас хойш Их Британи Украинд нийт 4.8 тэрбум ам.долларын цэрэг, хүмүүнлэг, эдийн засгийн тусламж олгоод байна. Түүнчлэн, талууд өрнөдийн орнуудад царцаагдсан Оросын активыг Украины сэргээн босголтод ашиглах зорилгоор хууль ёсны бүхий л арга хэмжээ авахаар тохиролцжээ. Хамтарсан тунхагт зааснаар Их Британи Оросын эдийн засгийн гол салбарууд болон Украин дахь цэргийн ажиллагааг дэмжиж буй хувь хүмүүсийн эсрэг шинэ хориг арга хэмжээ авахаар төлөвлөж байна.

Лхагва гарагт болсон айлчлалынхаа хүрээнд Владимир Зеленский Их Британийн парламентад үг хэлж, Букингемийн ордонд хаан III Чарльзд бараалхан, Украины цэргүүдийг бэлтгэж байгаа цэргийн баазад зочилжээ.

Мөн өдөр тэрбээр Парист хүрэлцэн ирж, Францын ерөнхийлөгч Эммануэль Макрон, Германы Канцлер Олаф Шольцтой уулзав. Олаф Шольц Герман Киевт цэргийн дэмжлэг шаардлагатай хугацаанд үзүүлсээр байх болно хэмээн мэдэгджээ.

Зеленский Макрон, Шольц нараас Киевт онгоц, хүнд зэвсэг, техник яаралтай нийлүүлэх хүсэлт тавьжээ.