ХЭН ЮУ ХЭЛЭВ | Би төрийн нууц задруулаагүй

Энэ удаагийн "ХЭН ЮУ ХЭЛЭВ" буландаа УИХ-ын гишүүн Х.Тэмүүжин, Яруу найрагч Ц.Хулан, Хот байгуулалт, барилга, орон сууцжуулалтын сайд Ж.Батсуурь нарын хэлсэн үгнээс онцолж байна.

УИХ-ын гишүүн Х.ТЭМҮҮЖИН:

-Бага насны хүүхэд хүчирхийлсэн хүний тухай мэдээллийг ил болгосны төлөө яагаад ял авч байгаа юм бэ. Бусад улс оронд бол энэ хүүхэдтэй хүн бүрийн мэдэх эрхийн тухай асуудал. Байшин авахдаа хүртэл "Энэ дүүрэгт хүчирхийлэгч амьдарч байна уу" гэдгийг мэдэх эрх нь тэдэнд байдаг.

Гэтэл Монголд хүчирхийлэгчийн шүүхийн шийдвэрийг ил болгосны төлөө яагаад ял авдаг юм бэ? Шударга ёс гэдэг хэмжүүр Монголд болон дэлхийн бусад улс оронд тэнгэр газар шиг ялгаатай явж байна.

Дорноговьд 12 настай охин амиа алдсан хэрэг гарахад сэтгүүлч Н.Өнөрцэцэг хэрэгтнийг өмнө нь хүүхэд хүчирхийлж байсан тухай мэдээлсэн байдаг. Энэ нь хувийн нууц задруулсан Эрүүгийн гэмт хэрэг болчихжээ. Нийт хорих ялын хоёр жил нь чухам үүнд үндэслэсэн гэдэг мэдээлэл байна.

Яруу найрагч Ц.ХУЛАН:

-2024 оны УИХ-ын сонгуулийн дүнд бүрэлдсэн шинэ парламент хүний эрхийг дээдэлсэн хууль эрх зүйн шинэчлэлийн бодлого явуулж эхэлснийг талархан хүлээж авч үг хэлэх, хэвлэн нийтлэх эрхийнхээ дагуу уг захидлыг Ерөнхийлөгч танд хэвлэл мэдээллийн хэрэгсэл, олон нийтийн цахим сүлжээгээр уламжлан хүргүүлж байна.

Гандан хийдийн зүгээс Х Богдын асуудлыг өмчирхөж буйг таслан зогсоох үүднээс Х Богдыг мөнгө, улс төрөөс хол ангид байлгахыг гуйж Далай ламд захидал бичиж өргөсөн. Эдгээр үг үйлдлийг Хятадын тагнуулын үйл ажиллагаа гэж мушгин гуйвуулж, дархалж, буруу ойлгож хэлс хэрэгт унагасанд гомдолтой байна.

Би төрийн нууц задруулаагүй. Миний дансанд нэг ч юань, төгрөг, ам.доллар ороогүй. Гэм буруугүй гэдгээ мэдсээр байж, амьдрал хувь заяаны өчүүхэн сорилгод би нугарахгүй. Хэргийг минь улстөржихгүй, бодит үнэнээр нь шүүлгэхийг л Төрийн тэргүүн танаас хүсч, энэхүү захидлаар хандав.

Хот байгуулалт, барилга, орон сууцжуулалтын сайд Ж.БАТСУУРЬ:

-Ирэх жил ипотекийн зээлийн санхүүжилтийг 1.2 их наядад хүргэнэ. Ингэснээр орон сууцны зээлийн хүртээмж нэмэгдэнэ. Үүний тулд хэд хэдэн эрх зүйн шинэчлэл хийх гэж байгаа. Барилгын тухай хууль, Үндэсний баялгийн сангийн тухай хуульд өөрчлөлт оруулна. Үндэсний баялгийн сангаас 500-600 тэрбум төгрөг гаргаж ипотекийн зээлийг санхүүжүүлнэ. Зээлийн эргэн төлөлтөөс 500-600 тэрбум төгрөг орж ирнэ. Ингээд жилдээ 1.2 их наяд төгрөгөөр ипотекийн зээлийг санхүүжүүлнэ гэсэн үг. Ирэх жилүүдэд нийтдээ 150 мянган айлын орон сууцыг ашиглалтад оруулах төлөвлөгөөтэй ажиллаж байна. Мөн бид ирэх жилүүдэд амины орон сууцанд ипотекийн зээл олгоно.