Диего Марадонагийн үхэл гэнэтийн биш байсан гэж үзэж байна

Диего Марадона гэнэт нас бараагүй болохыг түүний цогцост хийсэн задлан шинжилгээ харуулсан ба түүнийг эмнэлэгт хэвтүүлэн эмчлэх шаардлагатай байсан юм гэж Аргентины хөлбөмбөгчин, дэлхийн аварга Диего Марадонагийн үхэлтэй холбоотой хэргийг хянан хэлэлцэж буй шүүх хуралдаан дээр шүүх эмнэлгийн мэргэжилтнүүд мэдэгдсэн байна.

“Түүний дотор эрхтнүүдэд хэдэн өдрийн турш шингэн хуримтлагдаж байжээ. Түүний биеийн байдлыг урьдчилан оношлох боломж бүрэн байсан аж. Урьдчилан таамаглах боломжгүй гэнэтийн үхэл байгаагүй” гэж шүүх эмнэлгийн мэргэжилтэн Карлос Маурисио Кассинелли мэдүүлжээ.

Диего Марадонагийн үхэлтэй холбоотой хэргийг шүүх гуравдугаар сарын 11-нд хянан хэлэлцэж эхэлжээ. Хөлбөмбөгчин тархиндаа мэс засал хийлгээд эмнэлгээс гарсны дараа түүнийг гэрт нь асран ажиглаж байсан эмнэлгийн найман ажилтанд хүндрүүлэх нөхцөлтэйгөөр санаандгүй аллага үйлдсэн гэсэн ял тулгаж байгаа юм байна. Марадона 2020 оны арваннэгдүгээр сарын 11-нээс 25 хүртэл гэртээ эмчлүүлж байгаад нас барсан юм.

Марадонагийн дотор эрхтнүүдэд их хэмжээний шингэн хуримтлагдсан, зүрх нь байх ёстой хэмжээнээс хоёр дахин томорсон байсныг задлан шинжилгээ харуулсан. Түүнийг асарч байсан эмч нар өвчтөний биеийн байдлын шинж тэмдэг муудаж байгааг анзаарах ёстой байсан гэж шүүх эмнэлгийн мэргэжилтэн үзэж байна.