Овечкин домогт Гретцкигийн дээд амжилтад тулж ирлээ

“Миний мэдэх хамгийн аугаа тамирчин бол миний ээж” хэмээн хэдхэн хоногийн өмнө ярилцлагадаа өгүүлсэн NHL-ийн “Вашингтон Капиталз”-ын ахлагч Александр Овечкин “Буффало Сэйбрз”-д гоол оруулснаар түүхэн том дээд амжилт руу улам дөхлөө.

Канадын домогт хоккейчин Уэйн Гретцкигийн 894 гоол оруулсан дээд амжилтад хүрэхэд орос тамирчинд ердөө 4 гоол л дутуу болов.

Уэйн Гретцки 1487 тоглолтод 894 гоол оруулсан байдаг бол 39 настай Александр Овечкин 2005 оноос хойш NHL-д нийт 1483 тоглолтод оролцож, одоогоор 890 гоол, 723 дамжуулалт өгчээ. Энэ улиралд 37 гоолтой яваа юм. Овечкиний баг 73 тоглолтод 103 оноотойгоор бүсээ тэргүүлж явна.

Харин ээжийгээ яагаад хамгийн аугаа тамирчин гэж хэлсэн тухайд бол Александрын ээж Татьяна Овечкина Олимпын хошой аварга, Дэлхийн аварга, Европын 6 удаагийн аварга сагсанбөмбөгч юм. Тэгвэл аав Михаил Овечкин нь хөлбөмбөгч байсан.