25 настай теннисчин охиноо аав нь ичиж, хямарсандаа буудан хөнөөжээ

Энэтхэгийн Дели хотоос холгүй орших Гругурамд өчигдөр олныг хирдхийлгэсэн аллага гарлаа.

25 настай теннисчин бүсгүй Радхика Ядавыг гэртээ өглөөний цай бэлдэж байхад аав нь таван удаа араас нь буудаж хөнөөжээ. Таван сумын гурав нь нуруунд тусаж, аминд хүрчээ.

Шархдсан бүсгүйг хамаатнууд нь яаралтай эмнэлэгт хүргэхийг хичээсэн ч эмнэлэгт хүрэхээс өмнө амьсгал хураасан байна.

49 настай Дипак Ядав охиноо сэтгэл гутрал, уур бухимдал мөн ичсэнийхээ улмаас буудан хөнөөснөө хүлээсэн гэнэ. Охиныхоо олсон мөнгөөр амьдардаг, өөрөө бие даан амьдрах чадваргүй гэх зарим хүмүүсийн үгэнд эмзэглэж, ичиж, сэтгэл санаа нь тогтворгүй болсон үедээ энэ хэргийг үйлдсэн гэж мэдүүлжээ.

Радхика Ядав нутагтаа теннисний академи нээж, олон хүүхэд залуусыг сургаж дасгалжуулах ажил эрхэлж, мөнгө олдог байж. Охин нь амжилттай ажиллаж, аавыгаа тэжээж буй тухай нутгийнхны яриаг сонссон Дипак академиа хаахыг шаардсан ч татгалзсан хариулт сонссон тул уураа барьж дийлээгүй гэнэ.

Аавынхаа гарт амиа алдсан бүсгүйн найз нөхөд “Радхика ядарна, гутарна, шантарна гэдгийг мэддэггүй, үргэлж зогсолтгүй ажилладаг байлаа” гэж харамсан өгүүлжээ. Радхика багаасаа л теннист дурлаж, амжилттай тамирчин болохыг мөрөөдсөн ч орчин тойрны хүйсний гадуурхалтаас болж тамирчны зам нь хаагдаж байжээ.