Ига Швёнтек 114 жил үзэгдээгүй хол давамгайллаар Уимблдонд түрүүллээ

Уимблдоны эмэгтэйчүүдийн ганцаарчилсан төрлийн финалд Польшийн 24 настай Ига Швёнтек өрсөлдөгч АНУ-ын Аманда Анисимоваг 6:0, 6:0-ээр нэг ч гэйм өгөлгүй, “үзэлгүй” хожлоо. Энэ хожилдоо ердөө 57 минут л зарцуулжээ.

1911 оноос хойш Уимблдоны финалд ийм тасархай хол давамгай хожсон тоглолт болж байсангүй. 114 жилийн өмнө болсон тэрхүү финалд Доротэй Ламберт – Дорои Бүтби нар тулахад теннис орчин үеийн хэлбэрээсээ олон талаар өөр байлаа.
 

"Их дуулга”-ын дөрвөн цувралын хувьд бол 1988 онд домогт Штеффи Граф 6:0, 6:0-ээр Наташа Звереваг бут ниргэсэн удаатай юм. Үүнээс өөр тохиолдол том тэмцээний финалд байсангүй.

Ига Швёнтекийн энэ ялалтын бас нэг онцлог нь тэр зүлгэн дээр итгэлтэй төгс тоглож чаддаггүй байлаа. Бөмбөгийн ойлт бага учраас баруун гарын хүчтэй савалтаараа бөмбөгийг маш хурдтай эргэлттэй цохиход нь саад болж байна гэж мэргэжилтнүүд дүгнэдэг байсан. Тэгээд ч өмнө нь Уимблдонд 2023 онд шөвгийн наймд шалгарснаас өөр дээш амжилт гаргасан удаагүй.
 

“Дэндүү хол санагдаад байсан учраас би ийм ялалтыг мөрөөдөж ч байгаагүйгээ хэлэх нь шударга байх. “Их дуулга”-д хэд хэд түрүүлчихсэн ч гэлээ энэ удаад ингэж хожно гэж төсөөлсөнгүй. Хамт ажилласан багийнхандаа л баярлалаа гэж хэлье. Тэд маань маш их итгэсэн. Би өөртөө эргэлзэж байхад надад итгэсэн юм” хэмээн Ига Швёнтек өгүүлжээ.
 

“Их дуулга”-ын финалд зургаан удаа гарахдаа бүгдэд нь ялалт байгуулсан Ига Швёнтекийг мэргэжилтнүүд сэтгэлзүй маш сайтайн шинж хэмээн тодорхойлоод байна.
 

Харин Аманда Анисимова хожигдлынхоо дараагаар ярилцлага өгөхдөө нүдэндээ нулимстай хэвээрээ “Илүү хүчтэй болно оо гэж өөртөө хэлж байна. Мэдээж, ийм хожигдлыг давж гарна гэдэг хэцүү. Гэхдээ үүнийг ирээдүйд өөрийгөө улам ирлэх шалтгаан болгож ашиглахыг зорино” хэмээн өгүүлсэн байна.