Истанбул хотыг өрнөөс нь салгасан Ерөнхий сайд Монголд ирнэ

Хотын дарга байхдаа хээл хахуультай тэмцсэний дүнд Истанбул хотыг  2 тэрбум орчим ам.долларын өрнөөс нь салгаж, 4 орчим тэрбум ам.долларын хөрөнгө оруулалтыг хотын хөгжилд зориулан хийлгэж байсан Туркийн Ерөнхий сайд Рэжэп Тайип Эрдоан  энэ сарын 11-12-ны өдрүүдэд манай улсад албан ёсны айлчлал хийх гэж байна.Тэрээр  Монгол Улсын Ерөнхий сайд Н.Алтанхуягийн урилгаар ирж байгаа бөгөөд түүнтэй хэлэлцээ хийж, Монгол Улсын Ерөнхийлөгч Ц.Элбэгдорж, УИХ-ын дарга З.Энхболд нарт бараалхах юм байна.

Дашрамд өгүүлэхэд, Р.Т.Эрдоаны эцэг нь эргийн харуулын алба хашдаг хүн байсан бөгөөд Түркийн ирээдүйн Ерөнхий сайд өсвөр насандаа Истанбул хотын гудамжинд ундаа, нарийн боов худалдаалдаг байжээ. Тэрээр Истанбул хотын захирагчаар ажиллах хугацаандаа хотын хог хаягдлын асуудлыг шинээр шийдвэрлэж, замын хөдөлгөөнийг сайжруулах үүднээс 50 орчим гүүр, хурдны зам шинээр бариулсан нь үр дүнгээ өгсөн. Түүнчлэн эхэнд өгүүлсэнчлэн хотын даргын ажлыг хүлээн авахад Истанбул хот 2 тэрбум орчим ам.долларын өртэй байсан бөгөөд хээл хахуультай тэмцсэний дүнд 4 орчим тэрбум ам.долларын хөрөнгө оруулалтыг хотын хөгжилд зориулан хийлгэсэн байна.

Харин одоо Рэжэп Тайип Эрдоаны намтарыг хүргэе.

Төрсөн он сар өдөр:     1954 оны 2 сарын 26 –ны өдөр Истанбул хотод төрсөн. 59 настай

Боловсрол:

1973 он   Шашны тусгай дунд сургууль төгссөн /Имам Хатип/

1981 он   Истанбул хотын Мармара Их сургуулийн худалдаа, эдийн засгийн факультет төгссөн

Ажилласан байдал:

1969-1980 он    Сонирхогчийн хөл бөмбөгийн тоглогч

1970 он    Үндэсний авралын намын залуучуудын байгууллагын дарга

1985 он    Сайн сайхны намын Гүйцэтгэх Зөвлөлийн гишүүн, Истанбулын тойргийн дарга

1994 он     Истанбул хотын дарга

1997 он    Сиирт мужид болсон сонгуулийн үеэр ухуулга агуулсан шүлэг ишлэсэн хэргээр 4 сар шоронд хоригдсон

2001 он    Шударга ёс, хөгжлийн намын үүсгэн байгуулагч, дарга

2003 он    Сиирт мужаас нэр дэвшиж, сонгогдсон парламентын гишүүн

2003 оноос   Ерөнхий сайд

Гэр бүлийн   Эхнэр, 4 хүүхэдтэй

байдал:       

Сонирхол:    Хөл бөмбөг, уран зохиол