Орчин цагийн хэлмэгдүүлэлт дууссан тэр өдөр хөшөөг нураана

Дөрөвдүгээр сарын 12-13-нд шилжих шөнө, 13-ны үдээс өмнө.

Одоогоос яг нэг жилийн өмнө яг өнөөдрийнх шиг зэврүүн, жихүүдэс даасан өдөр байв. Монгол Улсын гурав дах Ерөнхийдлөгч, МАХН-ын дарга Н.Энхбаяр дээр дурдсан цаг хугацаанд “мангас”-уудын урт гарт өртөж улс төрийн хэлмэгдүүлэлтийн золиос болж байв. Цаг хугацаа үнэний шалгуур болдгийн хувьд бүтэн нэг жилийн хойно хэлмэгдүүлэлтийн урт гинжний үзүүрийг журмын нөхөд, шударга ёсыг эрхэмлэгч хэн бүхэн эрж хайж, энэхүү үнэн мөнийн эрлээ нэлээд дөхүүлсэн гэхэд болно. Гэвч хэнд эрх мэдэл байна, тэр түүгээрээ далайлгаж, хэнд булхай луйвар байна тэр түүнийгээ нуухын тулд өдгөө “мангас”-ууд мөнөөх гинжний үзээрийг нуухыг хичээж, хэдийгээр хэлмэгдүүлэлтэд өртсөн Н.Энхбаярын хэрэг явдал үнэн мөн нь тогтоогдсон ч ялтан гэгдсээр өнөөг хүрчээ.

Өнөөдөр орчин цагийн хэлмэгдүүлэлтийн эл хар өдрийг монголын нийгэмд сануулж, ахиж бүү давтагдаасай гэдэг үүднээс Шадар сайд Д.Тэрбишдагва, УИХ-ын дэд дарга Л.Цог, УИХ-ын гишүүн Ц.Оюунбаатар болон МАХН-ын Ерөнхий нарийн бичгийн дарга Г.Шийлэгдамба болон МАХН-ын гишүүд дэмжигчид Н.Энхбаярыг хүч түрэн баривчилж байсан байрны гадаа босгосон хөшөөний нээлтэд оролцлоо. Эл хөшөө нь хилсээр өргөст торны цаана хийгээгүй хэргийнхээ төлөө ял эдэлж буй хэн бүхний эрх, эрх чөлөө боогдож буйг илэрхийлсэн өргөст тор, дөнгө хийгээд гинжилж түгжсэн том хар цоожноос бүтсэн байна.

Нээлтийн үеэр Шадар сайд Д.Тэрбишдагва, “Монголын орчин цагийн түүхэнд одоогоос яг нэг жилийн өмнө хар хуудас нэмж, Н.Энхбаяр даргыг хэлмэгдүүлж байсан юм. Тэр цагаас хойш шударга ёсыг тогтоож, хэлмэгдүүлэлтийг зогсоохын төлөө МАХН-ын гишүүд дэмжигчид болон шударга үнэний төлөө амь амьдралаа зориулж яваа мянга мянган монголчууд эх орны өнцөг булан бүрээс дуу хоолойгоороо, бие сэтгэлээрээ тэмцэж өнөөг хүрлээ. Энэхүү улс төрийн хэлмэгдүүлэлт ахин бүү тодхиолдоосой гэдэг үүднээс энд энэхүү хөшөөг босгосон. Хэлмэгдүүлэлт дуусах тэр өдөр энэ хөшөөг нурааж, Монгол Улс хэлмэгдүүлэлтгүй боллоо гэж үзэх болно” гээд хөшөөг цоожилсон цоожны түлхүүрийг МАХН-ын Ерөнхий нарийн бичгийн дарга Г.Шийлэгдамбад гардууллаа. Улс төрийн хэлмэгдүүлэлт дуусч, МАХН-ын дарга Н.Энхбаярыг цагаатгах тэр өдөр энэхүү хөшөөний цоожийг онгойлгож, нураах аж.  

Монголчууд хэлмэгдүүлэлтийн гашуун түүхийг цус махаараа мэдэрч, олон гэр бүл хагацлын гашууныг амсч байсан түүхтэй. Тэгвэл орчин цагийн гэгдэж буй Н.Энхбаярын гэх тодотголтой хэлмэгдүүлэлтийн бараан сүүдэр олон мянган монголчууд болон түүний гэр бүлийнхэнд хүндээр туссан нь эл үйл явдлаас харагдаж байсан юм. Тиймээс иргэд эрх баригчид, төрийн өндөрлөгүүдээс энэхүү хэлмэгдүүлэлтээ даруйхан зогсоож, Н.Энхбаярыг цагаатгахыг шаардсан зурагт хуудас, уриа лоозон барьсан байв. Тэд хөшөө боссон газар буюу Н.Энхбаярыг хүчээр баривчилж байсан Удирдлагын академийн хашаанаас хөдөлж, улмаар Сүхбаатарын талбайгаар горооллоо.

С.Цахиур