“Манай Турк” гэдэг үг огцрох шалтгаан биш

МАН-ын гишүүдийн хувьд, энэ үг амны уншлага болоод байгаа бололтой. Турк улсын Ерөнхий сайд манай улсад айлчлах үеэр Н.Алтанхуяг сайдтан “Манай Турк” гэж хэлснээс болоод ийнхүү “шаналж” яваа гэнэ. “Шинэчлэлийн” Засгийн газрын тэргүүн алдаатай мэдээлэл хийснээс болоод хөрш хоёр орны харилцаанд сэв суух вий гэж болгоомжилж, Үндэсний аюулгүй байдлын асуудалд санаа зовниход хүрснээ тэд Төрийн байгуулалтын байнгын хорооны хуралдаан дээр илэрхийлэв. Монгол Улсын Ерөнхий сайд Н.Алтанхуяг тухайн үед хийсэн мэдэгдэлдээ “Энэ бол хоёр хүний уулзсан асуудал” гэсэн нь улс орны эрх ашигт үл нийцэх, хөнгөн гоомой хариулт гэж үзсэн аж.

Харин эрхэм сайд энэ бүхнийг эсэргүүцэж “Гадаад харилцааны асуудал учраас энэ тухай тэгж их дэлгэрэнгүй яримааргүй байна. Би ямар ч мэдэгдэл хийгээгүй, тухайн үед. Улс орнуудын удирдлагууд уулзаж ярилцах нь нэг өөр асуудал. Мөн монголчууд гадаад бодлогоо хэрхэн авч явах нь ч тусдаа асуудал гэсэн утгаар нэг сурвалжлагчид ярьсан. Гэтэл зарим нэг өгүүлбэрийг нь хасч орхиод улстөржүүлж эхэллээ. Манай Турк гээд хэлчихээр яадаг юм бэ. 2007 оноос хойш манай улсын иргэд Туркт 30 хоногийн хугацаанд визгүй зорчиж байгаа. Өнгөрсөн онд гэхэд, 6500 иргэн тус улсад зорчсон судалгаа бий. Турк улсын иргэд ч манай улсад визгүй зорчих боломж хэр байгаа талаар ярилцсан зүйл бий. Гэтэл ганцхан үгнээс болоод хөрш орнуудын харилцаанд сэв суулгах хэмжээнд хүртэл асуудлыг дэврээсэн учир би ТЕГ-т шалгах үүрэг өгсөн. Энд нэг их нууцсаад байх юмгүй” гэлээ.

Энэ үеэр Я.Содбаатар гишүүн “Өнгөрсөн ням гарагт Сонгинохайрхан дүүрэгт болсон УИХ-ын 26 дугаар тойргийн дахин сонгуулийн санал хураалтын өмнөхөн та цахим ертөнцөөр сурталчилгаа хийсэн. Хууль зөрчсөн үйлдэл биш гэж үү” хэмээн сануулахад сайд “Би тэр нарийн ширийн юмыг нь мэдэхгүй. Гэхдээ иргэдийг сонгуульдаа идэвхтэй оролцоорой гэж уриалсан. Өөрчлөлт, шинэчлэлт улс оронд маань хэрэгтэй байгаа шүү гэж хэлснээс өөр юм яриагүй” гэж тайлбарласан юм. Юутай ч, нэлээд ширүүхэн маргаан өрнөж буй тус хуралдаан өндөрлөх дөхөж байгаа бололтой. Харин олон асуултад ээрэгдэж буй Ерөнхий сайд Н.Алтанхуягийн огцрох, эсэх асуудал хэрхэн шийдэгдэхийг харах л үлдлээ.

Р.Есүй