ХҮҮХЭД ТӨРҮҮЛСЭН АСРАГЧ МӨНГӨ ТӨЛЖ АЖИЛДАА ОРНО

Ерөнхийлөгч өө, Та заавал уншаарай

 Гучин дөрвөн настай Наранбаатар эхнэртэйгээ муудалцсан хор шарандаа хадмынхаа гэрийг шатаан зургаан хүний амь насанд хүрэхдээ согтуу байжээ. 

•  “Эрдэм транс” ХХК-ийн Daewoo bus-105 маркийн 0603 УНБ улсын дугаартай автобусны жолооч согтууруулах ундааны зүйл хэрэглэсэн үедээ тээврийн хэрэгсэл жолоодон үйлчилгээнд гарах гэж байгаад баригдав.   
• Монголын нэг иргэнд 33 литр архи, согтоох ундаа ноогдож байна. Дэлхийд нэг хүнд ноогдох архи дарс 8 литрээс давбал үндэсний аюулгүй байдалд нөлөөлөхүйц гэж үздэгийг Ерөнхийлөгч Ц.Элбэгдорж анхааруулав.  

Монголд энх цаг үе ноёлох мэт боловч зурагт, сонин, сайтаас дуулж мэддэг ийм мэдээнүүд  бидний амьдралын гуниг сүүдэр, нулимс эмгэнэл. Архичдын 60 хувь нь хөлчүүрхэлд живсэн гэр бүлд төрж өсдөг байна. Нийгмийн санаа бодлыг зовоосон хамгийн ноцтой асуудлаар архидалт байнга “шалгарч”, ердийн иргэнээс Ерөнхийлөгчөө хүртэл савнаасаа бусдыг дийлдэг ундаанд донтох явдлыг тас цохихыг хүсч байгаа боловч яг фронт дээрээ байдал муу байгаа билээ. Ард иргэд, шийдвэр гаргагчид архидалтын эсрэг тэмцлийг хүсч шаардаж, уриалж идэвхжиж байгаа ч байлдааны талбар дээрх офицерууд даалгавраа биелүүлэхгүй бол энх цаг ирэхгүй. Шархадны гэдэг Сэтгэцийн эрүүл мэндийн үндэсний төв бол архинд донтох өвчинтэй тэмцэх манай улсын хамгийн том “цэргийн анги”. Харин энэ цэргийн ангийн удирдлага үндсэн даалгавраа биелүүлж, Берлинийг эзлэхгүй бол ялалтын парад болохгүй. Архидалттай тэмцэх гвардийн хороо гэж бодож явтал дарга удирдлага нь аль талд тулалдаад яваа бол гэж гайхмаар баримтууд гарч байна.

Ерөнхий захирал Л.Эрдэнэбаяр нас тогтсон эр хүн атлаа их эмч Энхтуяа гэдэг эмэгтэйг зодож байхтай Эрүүл мэндийн сайд нь өөрөө таарч бөөн шуугиан болж байв. Агуу бичгийн хүн А.П. Чеховын  6 дугаар тасаг зохиолын нэр санаанд бууна. Захирал нь эмчээ зодсон нь хачирхалтайгаас гадна юуны учир ийнхүү хилэгнэв гэдэг нь илүү сонин. Эмч эгэл жирийн ажилчдаа өмөөрөөд хохирсон байна. Юунаас өмөөрөв гэхээр жишээ нь, жирэмсний амралтаа эдэлж дуусгаад ажилдаа орохыг хүсвэл мөнгө төл гэсэн учир. Цалингаас цалингийн хооронд, сэтгэцийн өвчтөн, архинд донтогсодтой тулж ажилладаг сувилагч, асрагч нараас 500 мянган төгрөг нэхсэнээс болсон байгаа юм. Эмчээ гөвсөн захирлыг Н.Удвал сайд ажлаас нь халсан боловч Л.Эрдэнэбаяр одоо ч Шархаданд данагар яваа. Дэд захирал, одоо түр үүрэг гүйцэтгэч Л.Насанцэнгэл хуучин даргаа зөвлөхөөр томилсон, цалин нь 1,6 сая төгрөг, албаны унаа унаштай. Эмнэлгийн зөвлөх болгон ийм цалинтай, унаа тэрэгтэй байдаг бол Монголын төсөв үнэхээр зузаан гэсэн үг. Даанч төсвийн хууль журмаар болохгүй. Хуучин захирал, үүрэг гүйцэтгэгч хоёр олон юмаар адил төстэй, ганзага нийлдэг улс. Хоёулаа улсын эмнэлгийг ах дүүсээрээ дүүргэсэн. Л.Эрдэнэбаярын төрсөн дүү Л.Эрдэнэчимэг нярав, Л.Эрдэнэцэцэг нь үнэгүй эм олгогч. Хүргэн Баярсайхан цаг бүртгэгч, түүний охин И.Баяржаргал Мэдээллийн технологийн албанд бүртгэлтэй. Ажлыг нь хийдэггүй, улсын төсвийн цалин авах дархан эрхтэй. Хүүхэд төрүүлсэн ажилчин эмэгтэй хагас саяыг төлж ажлын байраа хадгалдаг төлбөртэй байхад, захирлын дүүгийн хүүхэд хөдөлмөрлөхгүйгээр хөлсийг нь авдаг. Үнэгүй эм олгогчийн хүүхэд нь бас ажиллана. Өвчтөнүүдээр хоол цай хийлгэн зарж, эрх ашгаа хамгаалах чадваргүй хүмүүсийн хөдөлмөрөөр ашиг олдог тухай гомдол байна. Арай ч дээ гэж шүүмжилсэн хүмүүсийг ахдаа, ахынхаа үнэнч хамтрагч Л.Насанцэнгэлд ховлож амыг нь үдүүлдэг гэж байна. Энэ баримт бол бүхэл бүтэн эмгэнэлт кино хийхээр сэдэв болно.

Шархадны эмнэлгийн захирлын үүрэг гүйцэтгэгч Л.Насанцэнгэлийн ах дүү, амраг садан энд бүр олуулаа, гэхдээ бүхлээр нь шинэчилмээр өнөр өтгөн. Төрсөн ах, гурван дүү нь, эхнэр, хүүхдийн хамт бүгд нэг эмнэлэгт, 14 үүлээ данс бүртгэлтэй.Тэр бүү хэл үүрэг гүйцэтгэгчийн оюутан хүү нь их эмчийн цалин авч байна. Их эмчийн цалинтай оюутан Монголд ганцхан байдаг нь Л.Насанцэнгэлийн хүү.

Л.Эрдэнэбаяр, Л.Насанцэнгэл нарын удирдсан энэ эмнэлэгт ёс бус зүйл ёс болсон байна. Маш тодорхой баримт сөхвөл, энэ оны 1 дүгээр сарын 14-нд, нэг ёсондоо хүний эрхийн тунхаг болсон Үндсэн хуулийн тэмдэглэлт өдрийн маргааш  нэр бүхий 17 хүнээс ажилд оруулсаны төлөө тус бүрээс нь 1-1,8 сая төгрөг авсан байна. Жирэмсэний амралтаа дуусгаад ирсэн хоёр сувилагч, нэг асрагчаас тус бүр 500 мянгыг шаардаж байж ажилд нь эргүүлэн оруулсан гэнэ. Ажиллах эрхтэй хүмүүс төлбөр төлж байж авдаг цалинтай үлддэг бол захирлын үүрэг гүйцэтгэгч Л.Насанцэнгэл найз Х.Хулангийнхаа хүүг их эмч болгожээ. Болгожээ гэдэг нь Э.Мөнх гэх тэр залуу ерөөсөө эмч биш. Эмч биш байж хүн яаж эмчилдэг вэ гэдэг нь хариултгүй. Л.Эрдэнэбаяр нь Эрүүл мэндийн яамнаас олгодог клиникийн профессор цолыг өөрөө дур мэдэн түгээж, тус бүрийг нь 500 мянгаар үнэлжээ. Багшийн их сургуулийн нийгмийн ажилтны анги дүүргэсэн хүнд “Нийгмийн сэтгэцийн Анагаахын ажилтан” гэсэн шинэ мэргэжил бодож олон, тэрхүү ШБОС-оо сая төгрөгөөр үнэлсэн байна. Гуч гаруй эмчид диплом олгосон нь Мэргэжлийн хяналтын улсын байцаагч Ш.Оюунчимэгийн дүгнэлтээр хуурамч байсан нь тогтоогджээ. Гар дээрээс бэлэн мөнгөөр эм худалдсан нь өвчтөнд байгаа мөнгөнийн баримтаар батлагдах жишээтэй. Энэ мэтээр Сэтгэцийн эрүүл мэндийн төвийн удирдлагатай холбоотой алба амиа хольсон, ёс суртахуун, төсөв мөнгөтэй холбоотой олон асуудал хууль хяналтын байгууллагад очсон байна. Архи биш сүү өргөе гэж Ерөнхийлөгч нь уриалж, монгол хүн, монгол айл амь нас, аз жаргалаа алдаж асгаж байхад хамгийн чухал үүрэгтэй, цэргээр бол фронтод бүхнээс хүнд даалгавар биелүүлэн тулалдаж байх ёстой “гвардийн хороо” Шархадны эмнэлгийн захирагч удирдагч нарт 108 дугаар өндөрлөгийг эзлэх сонирхол ч алга. Ах дүү, амраг саднаа, амин  хувиа гэдэг хүмүүст архидалт ер нь хамаа байна уу? Шархадан дахь эмгэнэлт явдлыг өөрчлөх үү, Ерөнхийлөгч өө.