Норовын зээ нэрээ сольсон булхайг АН-ынхан хаацайлж эхэллээ

Ерөнхий сайд Н.Алтанхуягийг огцруулах асуудал өнөөдрийн УИХ-ын чуулганы хуралдаанаар ид яригдаж байна. УИХ дахь МАН-ын гишүүд Ерөнхий сайд Н.Алтанхуягт хариуцлага хүлээлгэн огцруулах асуудлыг өргөн барьсны дараа түүний ёс бус булхай нь илэрсэн хэдий ч тэрбээр асар богино хугацаанд асуудлыг нуун далдлахыг хичээж 17 тэрбумын тендерийг авсан Г.Уянгыг Ч.Уянга болгон хольж солин бантан зуурч сууна.

Тус намын бүлгийнхэн УИХ-ын даргад хандан ажлын хэсэг байгуулах хүсэлт тавьсан ч “Ажлын хэсэг байгуулах боломжгүй” гэсэн тул УИХ дахь МАН-ын бүлэг дангаараа ажлын хэсэг байгуулж, Тавантолгойн тендерт Ерөнхий сайд Н.Алтанхуягийн дүүгийн компани шалгарсан эсэх, Монголбанк “Чингис бонд”-ын мөнгөнөөс алт худалдан авсан эсэх, төрийн албаны орон тоо өмнөхөөс хэдэн хувиар өсөв гэдгийг тус бүр тодруулж тодорхой мэдээлэл баримт цуглуулсан байна. Энэ үеэр л Тавантолгой компанийн тендерт “Говь повер” компани оролцож, ялсан гэх мэдээлэл нь үнэн болохыг тогтоосон бөгөөд тендерт ялагч нь Ерөнхий сайд Н.Алтанхуягийн дүүгийнх нь хүүхэд болохыг ч тогтоосон байдаг.

Тендерт ялсан “Говь повер” компанийн захирал Г.Уянга нь Засгийн газрын хэрэг эрхлэх газрын дэд дарга Г.Дэнзэнгийн гэргий гэдгийг мэдэх нэг нь мэднэ. Мөн Ерөнхий сайд Н.Алтанхуягийн дүү төрсөн дүү Норовын Наранцэцэгээс төрсөн охин гэдгийг ч мэдэх хүмүүс байна.

Ерөнхий сайдын хүргэн Г.Дэнзэн нь Засгийн газрын хэрэг эрхлэх газрын дэд даргын албыг “Эрдэнэс Тавантолгой” компанийн ТУЗ-ийн даргын ажилтай хослуулан хашдаг нэгэн. Ийм л сэргэлэн учиртай гурван толгой 17 тэрбумын тендерийг авч бас эзэн нь болох Г.Уянгыг Ч.Уянгаар сольж орхижээ.

Улсын бүртгэлийн ерөнхий газраас авсан баттай баримтаар бол тендерт ялсан компанийн жинхэнэ эзэн нь Ерөнхий сайдын дүүгийн хүүхэд Г.Уянга. Гэтэл түүнтэй  дөрөө харшлуулан ижилсэж “Говь повер”-ийн 2-догч эзнээр тодроод байгаа Ч.Уянга нь 1985 онд төрсөн, Дорноговь аймгийн харьяат нэгэн боловч суугуул нутаг нь Улаанбаатар хотын Баянзүрх дүүрэгт байрлах хоосон эзэнгүй хашаа. Ийн буух эзэнгүй буцах хаяггүй шахам бас нэг Уянга 17 тэрбумын хэрэгт хутгалдлаа.

Үүгээр ч зогсохгүй тендерт ялсан “Говь повер” компанийн нэр дээр ч мөнөөхөн хоёр Уянгатай холбоотой материал бүрджээ.

Мөн “Говь повер” компани нь Тавантолгойн тендерт оролцохоосоо өмнө компанийн өөрийнх нь үнэлгээ нэг сая төгрөг байсныг Г.Уянга худалдан авч, нэг өдрийн дотор бичиг баримтыг нь өөрчлөн, нэг тэрбум төгрөгийн үнэтэй болгож, тендерт оролцоод, долоо хоногийн дараа 17.7 тэрбум төгрөгийн үнэтэй тендерийг авсан байжээ. 

Эл тендерийг авахын тулд ТУЗ-ын дарга нь өөрийн гэр бүлийн компанийг шалгаруулж өдгөө манай эхнэр биш гэсэн мэдэгдэл хийсэн төдийгүй УИХ дахт намын бүлгийнхэн нь ч буруугүй хэмээн сүрэглэн давшилж эхэллээ. Ёстой л үхэхдээ үхэр буугаа тавив гэгч л болж буй бололтой.