Б.Батболд: Хэн ч ерөнхийлөгч болсон юу ч өөрчлөгдөхгүйд л...

Монгол Улсын Ерөнхийлөгчийн сонгуульд АН болоод МАН-аас нэр дэвших эрхмүүд ингээд ойлгомжтой болчихлоо. Улстөрийн хоёр гол хүчнээс нэр дэвшигчид тодорхой болсонтой зэрэгцэн улстөрийн бусад намуудын зүгээс ч байр сууриа илэрхийлж байна. Тухайлбал, МУНН-ын дарга Б.Батболд эрхэм “АН+МАН хоёр МУ-ын Ерөнхийлөгчийн сонгуульд нилээн ширүүн өрсөлдөх шинжтэй байх шиг байна даа. Энэ нь юу гэсэн үг вэ гэхээр элдэв доромжлол, гүтгэлэг, ард түмнээ талцуулах нь дээд оргилдоо хүрнээ л гэсэн үг... Мөн чанартаа хэн ч ерөнхийлөгч болсон юу ч өөрчлөгдөхгүйд л байгаа нь харамсалтай. Монгол Улсад үйлчилж буй Үндсэн хууль болон бусад органик хуулиудаа өөрчлөхгүйгээр энэ эзэнгүйдэл эх захгүй замбараагүйтэл эцэс төсгөлгүй л үргэлжилнэ. АН харин зоригтой улс төрийн реформоо хийх л хэрэгтэй. Энэ бол тэдний оноолт эс чадвал эргээд МАНАН-д автана. Гэхдээ маш өтгөн манан юу ч харагдахаа болино... За ийм л ойрын ирээдүй харагдаж байна даа. Хамгийн гол нь хоорондоо талцаж зодолдох хэрэг байхгүй эрх баригчдыг реформ хийхэд л шахах нь ард түмний хувьд хамгийн чухал нь гэж би бодож байна.

Өндөр нам, хэлтэй устай, булчинтай шөрмөстэй, идсэн уусан, эхнэр хүүхэд нь ийм тийм, Монголжуу гэж ирээд л элдвээр донгодож эхлэнэ. Эцсийн дүнд хэн нь ч гарсан ялгаагүй тийм л эрх зүйн орчин эмгэнэлт жүжиг нь өрсөлдөгч этгээдүүдийг харахаас дургүй хүргэмээр болгоод энэ сонгууль дуусна. Эндээс л төрд итгэх итгэл алдрах эх сурвалж тавигддаг. Төрдөө ард нь итгэхгүй байх нь харь элэгтэнд л хэрэгтэй болохоос маньд огт хэрэггүй зүйл л дээ...” гэсэн байна.