Улстөрд “Бат-Эрдэнэ” гэдэг цол байхгүй

Эрийн гурван наадмын зүлэг ногоон дэвжээнээс парламентын танхим хүртэл дэвж, дэлж чадсан Дархан аварга Б.Бат-Эрдэнэ өдгөө Монгол Улсын Ерөнхийлөгчийн сэнтий өөд зүтгэж эхэллээ. Дур эзнээ голохгүй гэж энэ. Үүнээс гадна энэ удаагийн сонгуульд сойж өрсөлдөгчөө өвдөг шороодуулчих магадлал өндөртэй, нэр цэвэр боловсон хүчин аргагүй л дутаж МАН-д. Угаасаа л намын дарга Ө.Энхтүвшин, Д.Оюунхорол, Д.Лүндээжанцан, Б.Бат-Эрдэнэ гэсэн дөрвөн хүнээс л нэгийг нь “сугалах” ёстой байсан. Тэр дагуу асуудал шийдэгдлээ хэмээж байгаа боловч яг үнэндээ Б.Бат-Эрдэнээс илүүрхэх нэгэн байсангүй.

Хэдэн сарны өмнөөс Ерөнхий сайд асан С.Баярыг нэр дэвшиж магадгүй гэх хардлага нийгэмд байсан боловч түүний нэр огтхон ч дурьдагдсангүй. Уг нь Ерөнхий сайд асан маань “Интоорын компот” гэж ирээд л сүрхий сүрхий дурсамж тэрлэж, энэ нь “Эгэл энгийн нэгэн юм” гэх сэтгэгдлийг нийтэд төрүүлээд амжсан. Гэвч тэр сураг алга. Гэхдээ улстөрд дахин хөл тавих, ард түмэнд итгэмжлэгдэнэ гэдэг асуудал С.Баярын хувьд хүнд. Тэрбээр Ерөнхий сайдын сэнтийд сууж байх ахуйдаа маргаантай маапантай уул уурхайн асуудалд хошуу дүрж нэрээ “баасдаад” авсан түүнийг Канадууд зодсон гэх мэдээлэл түгж байв. Үүнээс гадна оросын хүн гэх дагавар нь ч түүнээс салахгүй.

Харин Ерөнхийлөгч асан Н.Багабандийг нэр дэвшиж магадгүй гэх шум хальт яваад өнгөрсөн. түүнийг ийн “хардах”-ын учир нь Оюутолгой дахь өндөр цалинтай ажлаасаа татгалзаж байна мэдээллийн дараа болсон хэрэг. Гэсэн ч түүний нэр бүү хэл “Б” үсэг нь ч дурьдагдаагүй өнгөрсөн юм.

Харин тус намаас хамгийн их чимээ тавьж энэ эрхийн төлөө зүтгэсэн хүн бол УИХ-ын гишүүн Д.Оюунхорол. Тэр яагаад эмэгтэй Ерөнхийлөгч байж болохгүй гэж хэмээн хэзээний ялсан аятай асуудлыг “шидэж” эмэгтэй гишүүд ч түүнийг дэмжиж байгаагаа илэрхийлж байсан ч МАН-ын Бга хурлын үеэр 12.5%-ийн санал авсан нь намынхан нь түүнийг хэр дэмжиж байгааг илхэн харуулав.

Ингээд асуудал цэгцэрч эхлэхэд Монголын улсын Үндсэний их баяр наадамд 11 удаа түрүүлсэн Дархан аварга Б.Бат-Эрдэнэ олны саналаар илүүрхэж Ерөнхийлөгчийн сонгуульд хүч үзэх боллоо.

Түүнд сонгуулиар гараад ирчих шанс бий учраас анхнаасаа л нэр дэвшүүлэх нь тодорхой байсан хэмээж байгаа нь ч ортой байх. Учир нь тэр олонд танигдах гэж зовохгүй. Тэр ч бүү хэл гадаадынхан хүртэл “Бат-Эрдэнэ гэдэг цол байдаг юм уу“ хэмээж байсан гэдэг. PR хийх нь ч амар. Нэг аймаг руу нэг шавиа дагуулаад явахад л асуудал тодорхой болно гэж байгаа. Энэ мэтээр намынхаа бусад нөхдөөс давуу тал ихтэй түүнд нам нь найдлага тавьж байгаа нь мэдээж.

УИХ-ын гишүүн, Монгол Улсын хөдөлмөрийн баатар, Даяар дуурсагдах Далай Даян Дархан аварга, Хуульзүйн ухааны доктор, Цагдаагийн хурандаа Бадмаанямбуугийн Бат-Эрдэнэ гэж нөхөр ямар ч байсан “гүлдгэр” нөхөр биш.

Түүнд итгэлт шавь нар ч олон бий. Өвөрхангай аймаг руу Их аварга Д.Дагвадорж, Д.Сумъяабазар нарын ах дүү бөхчүүд дагалдана. Харин Завхан аймаг руу Гарьд М.Баяржавхлан, Хөвсгөл аймаг руу Х.Мөнхбаатар арслан, Говь-Алтай аймаг руу гарьд Н.Ганбаатар, Ама Д.Бямбадорж нарын бөхчүүдийг дагуулчих л эр. Манайхан л болсон хойно бөх, морь хоёроо дээдэлдэг уламжлалтай хэмээн хөөрч хөвсөлзөж мэдэх л нөхдүүд дээ.

Н.Алтан