Л.Цог уу, О.Цолмон уу

Улстөрийн намууд Монгол Улсын Ерөнхийлөгчид нэр дэвшигчээ ид тодруулж байна. Өнөөдрийн байдлаар голлох байр суурьтай байгаа хүчнүүд нэр дэвшигчээ зарлаж, батламжийг нь албан ёсоор гардуулсан. Өөрөөр хэлбэл АН болон МАН Ерөнхийлөгчид өрсөлдөх лидерүүдээ албан ёсоор зарласан төдийгүй нэр дэвшигчээ батламжилж байна гэх нэрийдлээр сонгуулийн PR-ыг нь хийгээд эхэлчихлээ. Манай намаас нэр дэвшиж байгаа хүн бол хун шиг сэтгэлтэй тогос шиг хүн байгаа юм гэж хэлэх нь холгүй болж байна.

Харин дээрх хоёр намын нэр дэвшигчийн саналыг хуваах эрхмүүд тодорхой болоогүй. МАХН-ын тухайд өнөөдөр нэр дэвшигчээ тодруулна. Тус намын зүгээс хийсэн мэдээллээр бол УИХ-ын дэд дарга Л.Цог, УИХ-ын гишүүн Д.Тэрбишдагва, Ч.Улаан, ЭМ-ийн сайд Н.Удвал дөрвөөс хэн нэгнийг нь “сугална” хэмээж байсан ч өнөөдөр салхи Н.Энхбаярын зүгт үлээж байгааг эх сурвалж хэллээ.

Гэхдээ нарсанд суугаа Н.Энхбаяр биш л дээ. Харин энэ хүнийг наранд мандаж байх үед буюу Монгол Улсын Ерөнхийлөгч байх үед нь олны танил болж чадсан хатагтай О.Цолмон нэр дэвшиж магадгүй байгаа гэх мэдээлэл чих шүргэлээ. Энэ талаар нэлээд эртнээс яригдаж байсан боловч тус намын албаны эх сурвалжууд няцааж байсан юм. Харин өнөөдөр эр нөхрөө “барьж”, улс орныг далдаас удирддаг байсан гэх О.Цолмонгийн нэр дэвших асуудал сэргэж байна. Дур эзнээ голохгүй гэгчээр нэр дэвшүүлэх асуудалд О.Цолмон нэг их татгалзахгүй нь мэдээж. Хэлье гэвэл хэлнэ, яръя гэвэл ярина. Түүнд улс орныг удирдах гэхээсээ илүүтэй “хор найруулах” авъяас бий гэдэг. Тиймдээ ч Монгол улсын гурав дахь Ерөнхийлөгч Н.Энхбаярын гэх томоохон вант улс улс орныг эзэгнэж байсан түүхтэй. Үүнд О.Цолмонгийн оролцоо их бий гэдгийг  улстөрийн хүрээнд ярьдаг байлаа.

Н.Энхбаярын гэргий О.Цолмон гэж хэн бэ?

Түүний эцгийн талын гурван үеийн намтар түүхийг Монголчууд андахгүй болсон байх. Цолмонгийн эцэг Онон, Ононгийн аав Цэнд, Цэндийн аав Гомбожав гэдэг хүн байсан гэдгийг хэвлэлүүд хангалттай цацсан. Мэдлэг мэргэжлийн тухайд Онон эмч, Цэнд улстөрч, Гомбожавыг мэргэн гүн хэмээн нэрийддэг байж.

Харин эхийн талыг нь хөөвөл Буриад удамтай. Гомбожав нь Агриппина Николаевна Боржонова гэх буриад бүсгүйтэй ханилан хоёр хүүхэдтэй болсны нэг нь Цолмонгийн өвөө болох Цэнд. Мэргэн гүн Гомбожав 1937 онд хэлмэгдүүлэлтэд өртөж баривчлагдсан бөгөөд тухайн үед түүнийг хоёр хүүхдийнх нь хамт баривчилж байжээ. Азаар эхнэр хүүхдүүд нь суллагдаж эсэн мэнд үлдэж харин Гомбожав амиа алдсан аж.

Хожим нь түүний хүү Цэнд Завхан аймгийн мод боловсруулах үйлдвэрт ажиллах болсон нь мөн л улстөрийн хэлмэгдүүлэлт байсан гэх. Тиймээс эцгийн талаасаа удам судраараа хэлмэгдсэн төдийгүй өдгөө эр нөхрийгөө ч хэлмэгдлийн шуурганд автаж шоронд сууж байна хэмээн ярих дуртай хатагтай.

Өдгөө О.Цолмон хараа хяналтгүй, эмзэг бүлгийн хүүхдүүдэд тусалдаг “Ерөөл сан”-гийн тэргүүнээр ажиллаж байгаа ч нөхрийнхөө намын асуудалд “хошуу дүрдэг” гэх. Хэдийгээр улстөрөөс ангид байхыг хүсдэг гэх боловч түүний өсөж өндийсөн орчин, одоо байгаа нөхцөл нь хэзээ ч улстөрөөс ангижруулахгүй байгаа бололтой. Гэхдээ тэр Н.Энхбаяраас ч өмнө УИХ-д нэр дэвшиж байсан түүх бий. Харин Н.Энхбаярыг Монгол Улсын Ерөнхий сайд болсны дараа Тагнуулын ерөнхий газрын зөвлөхөөр долоохон хоног ажиллаж байсан нэгэн гэдгийг Монголчууд мартаагүй. Тэр долоохон хоногийн хугацаанд нөхрийнхөө казино болон бас бус хэрэгтэй холбоотой мэдээллийг “устгасан” гэх. Мөн 2006 онд О.Цолмон нөхрөө төлөөлөн БНСУ-д очсон гэдэг.

О.Цолмон ЗХУ-ын Плехановын нэрэмжит Улс ардын аж ахуйн дээд сургуулийг эдийн засагч, философич мэргэжлээр төгссөн. Н.Энхбаяртай ханилан 4 хүүхэд төрүүлсэн. Том хүү нь Э.Батшугар. Удаах охиныг нь Э.Бямбадулам гэх ба бага хүүг нь Э.Дашнамжил гэдэг. Отгон охиныг Э.Ренчинлхам гэх.

Н.Энхбаярын эхнэр О.Цолмонгийн талаар товч танилцуулахад ийм байна.

Логийн Цог гэж хэн бэ?

Харин МАХН-аас Ерөнхийлөгчид нэр дэвшигчид “өрсөлдөж” байгаа УИХ-ын дэд дарга Л.Цогийн хувьд улстөрөөс бараа тасардаггүй нэгэн. Ёстой л эр хүн туг ч барина, тугал ч хариулна гэдгийн үлгэрээр төрийн өндөр албан тушаал хашиж л байдаг, бууж л байдаг нэгэн. Улстөрийн өндөр карьергүй ч түүнд аз бий.

Монгол Улсын Их Хурлын гишүүн

Монгол Улсын Их Хурлын дэд дарга

Төгссөн сургууль, мэргэжил

1970 онд 10 жилийн 1 дүгээр дунд сургууль

1977 онд ЗХУ-ын Эрхүүгийн Улсын их сургуулийн Хуулийн факультет

1988 онд ЗХУ-ын КНТХ-ны дэргэдэх Нийгмийн ухааны академи тус тус төгссөн

Ажилласан байдал

1977 - 1986 онд Улсын Прокурорын газарт хэлтсийн прокурор, хэлтсийн дарга

1988 - 1990 онд Монгол Ардын Хувьсгалт Намын төв хорооны дэргэдэх намын хянан шалгах хороонд байцаагч

1990 - 1992 онд Улсын Бага Хурлын Хууль зүйн байнгын хорооны дарга

1996 - 1999 онд Монгол Улсын Их Хурлын Тамгын газрын Ерөнхий нарийн бичгийн дарга

1999 онд Монгол Улсын Засгийн газрын гишүүн, Хууль зүйн сайд

2012 оноос Монгол Улсын Их Хурлын гишүүн

2012 оноос Монгол Улсын Их Хурлын дэд дарга

Гадаад хэл

Орос

Х.Амгалан