Залуухан ч ”халуухан” албан тушаал хашдаг улстөрчдийн хэн нь хэн бэ?

МАК-ын өв залгамжлагч, УИХ-ын хамгийн баян гишүүн Н.Номтойбаяр “МАН-ын асаалттай танк”-аар ажиллаж байгаа гэлтэй ийш тийшээ үсчиж “тоглодог” нэгэн. Эл эрхийг олж авах нь түүнд тунчиг амар хялбар байсан хэмээн үеийнхэн нь шивэр авир ярилцдаг юм билээ. Тодруулбал  "Тусгаар тогтнолын ордон"-г байгуулахад тэрбумтан аав нь нэг тэрбум төгрөг хандивлаж хүүгийнхээ улстөрийн замыг нь шулуутгаж, басхүү эрх дархыг бий болгосон гэдэг. Дардан замаар улстөрд гэрлийн хурдаар орж ирсэн тэрбээр байсхийгээд хэл ам гаргадаг ч зааж залруулахыг оролдох хүн үгүй. Тиймдээ залуухан гишүүн хэвлэлийн хуудаснаас салдаггүй гэмтэй.

Улаан номонд орсон хүрэн баавгай агналаа л гэнэ. Урд хойт эхнэрүүдээ уралдууллаа гэнэ. “Мон-Эрдэнэ” компанийн захирал П.Энхмөнхийг заналаа л гэнэ, “Адуун чулуу” компанийн өвгөн захирлыг загналаа л гэнэ, байнгын хорооны хурал дээр ширээгээ алгадлаа л гэнэ, байсхийгээд шоуддаг л гэнэ. Архи ууж агсамналаа л гэнэ, айлын охин эргүүллээ л гэнэ. Ер нь түүнтэй холбоотой асуудал дандаа “бараан” талдаа байдаг нь бардам, омголон зантай нь холбоотой хэмээн өмөөрөх нэг нь ч бий.

Хэдэн сарын өмнө хөлчүүхэн байх үедээ фэйсбүүктээ хэдэн үг бичээд орхисон чинь буруудаж адаг сүүлдээ хакердуулчихлаа хэмээн молиго үмхүүлсэн тэрбээр ээлжит дуулианаа твиттерээр цацсан нь ЗГХЭГ-ын дэд дарга Г.Дэнзэн рүү чиглэсэн байв. Хэвлэлээр нэг шуугисан эл асуудалд хэн ч хариу өгөх нь ойлгомжтой.

Гэтэл эрхэм гишүүн Н.Номтойбаяр “Н.Номтойбаяр” гэдэг нэр орсон үг, өгүүлбэр хэлэх л юм бол бүр илүү асуудлыг ярьж чадна” хэмээн ярьж яваа сурагтай. Оюун ухаант хүн бүү хэл өт хорхой хүртэл биед нь хүрэхээр хариу үйлдэл үзүүлдэг шүү дээ. Нөгөө алдарт “Алтжин”-гийн Г.Алтан хатагтай “Мөнгөөр чулууг ч нүхэлж болно” хэмээн хэлж энэ үг нь ч дээдсийн хүрээнд газар авсан гэдэг. Үүн лугаа адил мөнгөлөг бол өнгөлөг яваа нэгнийгээ унагаахад тунчиг хялбар хэмээн эрхм гишүүн боддог бололтой юм. Уг нь Н.Номтойбаяр томчуулын танхил хүүхдүүдийн жишгээр гадаадад гарч галуу шувууны мах зооглосон шигээ боловсрол эзэмшсэн байдаг юм билээ. Харин ЗГ-ын Хэрэг эрхлэх газрын дэд дарга Г.Дэнзэнгийн тухайд Н.Номтойбаяр шиг “Од” болоогүй нэгэн. МУИС-ийг төгссөн түүнийг шатны гишгүүрээр аажуухан дээшилж яваа даруухан нэгэн хэмээн ярьдаг юм билээ. Гэхдээ л УИХ-ын баян гишүүний шидсэн чулууны  хариуг нүүлгэв. Залуухан ч “халуухан” албан тушаал хашдаг энэ хоёр эрхэм хэн бэ. Тэдний талаар “бяцхан” сонжоо хийе.